Թուրքիայի հարցով ԵԽԽՎ զեկուցողները թուրքական իշխանություններին կոչ են արել անհապաղ ազատ արձակել ավելի քան 2 տարի անազատության մեջ գտնվող թուրք հայտնի գործարար, հասարակական գործիչ Օսման Քավալային: Այս կերպ ԵԽԽՎ համազեկուցողներ Թոմաս Համարբերգը, Ջոն Հոուելը, Ալեքսանդրա Լուիսն արձագանքել են Մարդու իրավունքների եվրոպական դատարանի որոշմանը, ըստ որի Թուրքիայի իշխանությունները խախտել են Եվրոպական կոնվենցիայի 5/1 և 5/4, 18-րդ հոդվածները:
«Ստրասբուրգի դատարանի վճիռը վերջնական է: Թուրքիայի իշխանություններին կոչ ենք անում անհապաղ կատարել վճիռը և անմիջապես ազատ արձակել 2017թ. հոկտեմբերի 18-ից անազատության մեջ գտնվող Օսման Քավալային»,-ընդգծել են զեկուցողները՝ հիշեցնելով, որ դատարանի վճիռը վերաբերում է ոչ միայն Գեզիի գործին, այլ նաև Քավալայի դեմ հարուցված մյուս գործին, որով նա մեղադրվում է 2016թ. հուլիսի 15-ին ձախողված հեղաշրջման մեջ ներգրավված լինելու համար, ինչն էլ հենց հիմք է հանդիսացել 2020թ. փետրվարի 19-ին նրան կրկին ձերբակալելու համար:
ԵԽԽՎ համազեկուցեղներն ընդգծել են, որ կորոնավիրուսի համավարակի իրավիճակով պայմանավորված, չափազանց կարևոր է Քավալայի, ինչպես նաև անազատության մեջ գտնվող թուրք մյուս հասարակական գործիչների, լրագրողների անհապաղ ազատ արձակումը:
Պատրաստեց՝ Վիկտորյա ԱՆԴՐԵԱՍՅԱՆԸ
