ԱԺ նախկին պատգամավոր Աբրահամ Մանուկյանի նկատմամբ հարուցված քրեական գործով նախագահող դատավոր Արտուշ Գաբրիելյանն ինքնաբացարկ հայտնեց:
Aravot.am-ի հետ զրույցում Աբրահամ Մանուկյանի պաշտպան, փաստաբան Հրանտ Անանյանը հայտնեց, որ իրենք հունիսի 24-ին՝ այսօր ժամը 09:30-ին, միջնորդություն են մուտքագրել դատավորի ինքնաբացարկի վերաբերյալ:
Նա մեզ հետ զրույցում մանրամասնեց. «Մենք պարզել ենք, որ երեկ պարոն Գաբրիելյանը դատական նիստեր է արել, և այսօր առավոտյան միջնորդություն ենք ներկայացրել նախագահող դատավորն ինքնաբացարկով հանդես գալ»:
Հիշեցնենք՝ Երեւան քաղաքի ընդհանուր իրավասության դատարանը ԱԺ նախկին պատգամավոր Աբրահամ Մանուկյանի նկատմամբ հարուցված քրեական գործով գնացել էր խորհրդակցական սենյակ: Հունիսի 24-ին պետք է հրապարակվեր Աբրահամ Մանուկյանի նկատմամբ խափանման միջոցը կալանավորում ընտրելու ԱԱԾ միջնորդության որոշումը:
Կարդացեք նաև
Սակայն արդեն կեսօրին պարզեցինք, որ դատավորը բավարարել է պաշտպանական կողմի՝ իր ինքնաբացարկի միջնորդությունը և ինքնաբացարկ հայտնել:
Հրանտ Անանյանն ասաց, որ գործը դեռ այլ դատավորի չի մակագրվել:
Հիշեցնենք՝ Աբրահամ Մանուկյանին մեղադրանք է առաջադրվել «ընտրակաշառքի գործով»՝ ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար։
Տաթև ՀԱՐՈՒԹՅՈՒՆՅԱՆ
