Երեւանի թիվ 1 տուն-ինտերնատում 26 մարդ վարակվել է կորոնավիրուսով, որից 22-ն այդտեղ խնամվող տարեցներ են, 4-ը՝ աշխատակիցներ: Ինչպես Aravot.am-ի հետ զրույցում ասաց աշխատանքի եւ սոցիալական հարցերի նախարարության մամլո խոսնակ Սոնա Մարտիրոսյանը, աշխատակիցներից մեկի մոտ ի հայտ են եկել ախտանշաններ, ինչից հետո տուն-ինտերնատի 46 անձ թեստավորվել է: Բոլոր այդ անձինք նշյալ աշխատակցի հետ եղել են կոնտակտավոր՝ հերթափոխի անդամներ եւ նրա կողմից խնամվող տարեցներ:
Ընդհանուր առմամբ այս տուն-ինտերնատում 160 անձ կա, սակայն ըստ Սոնա Մարտիրոսյանի, մնացածին թեստավորելու անհրաժեշտություն չի եղել: Նրա խոսքով, ի տարբերություն երկու աշխատակցի, որոնք ջերմություն ունեն եւ հոսպիտալացվել են, տարեցներից որեւէ մեկի մոտ որեւէ ախտանշան չկա: Նրանք հիվանդությունը տանում են անախտանիշ, ջերմություն չունեն, ոչ էլ որեւէ գանգատ: Նրանցից որեւէ մեկը չի հոսպիտալացվել:
Տարեցներն ու աշխատակիցները կորոնավիրուսի թեստ հանձնել են նախորդ շաբաթվա ընթացքում:
Հիշեցնենք, որ մոտ մեկ ամիս առաջ էլ կորոնավիրուսի դեպքեր հաստատվել էին Նորքի տուն-ինտերնատում եւ 40 անձ տեղափոխվել էին մայրաքաղաքի տարբեր հիվանդանոցներ: Նրանցից 17-ը տուն-ինտերնատի տարեց բնակիչներ էին, 28-ը՝ աշխատակիցներ: Երկու տարեցի կյանք, սակայն բժիշկներին փրկել չէր հաջողվել, մնացածն, ինչպես տեղեկացանք, արդեն վերադարձել են տուն-ինտերնատ եւ միայն մեկ տարեցի կրկնակի թեստավորել են եւ սպասում են պատասխանին, որպեսզի նա էլ հիվանդանոցից դուրս գրվի:
Կարդացեք նաև
Լուսինե ԲՈՒԴԱՂՅԱՆ
