Եվրամիությունը պետք է դադարեցնի Թուրքիայի հետ բանակցությունները անդամակցության հարցով, քանի որ այդ բանակցությունները դարձել են պատական սխալ: Ինչպես հաղորդում է TASS գործակալությունը, այս մասին հայտարարել է Եվրոպայի ժողովրդական կուսակցության ղեկավար Մանֆրեդ Վեբերը՝ Եվրախորհրդարանում ելույթի ժամանակ:
«Թուրքիային ԵՄ ընդունելու մասին բանակցությունները պատմական սխալ էին, որը միայն հիասթափություն առաջացրեց Թուրքիայում և երկիրը չմոտեցրեց ԵՄ-ին: Մենք պետք է դադարեցնենք անդամակցության մասին բանակցությունները Թուրքիայի հետ և մշակենք նոր իրավական հիմք՝ այդ երկրի հետ մեր հարաբերությունների համար… Այո, մենք ունեցել ենք համագործակցություն Թուրքիայի հետ և շարունակում ենք ունենալ շահեր, բայց մեր վերաբերմունքն այդ երկրի հանդեպ փոխվել է»,-հայտարարել է նա՝ դիմելով Եվրամիության արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Ջոզեպ Բորելին:
Վեբերը շեշտել է, որ Թուրքիան գնալով ավելի է հեռանում Եվրամիության արժեքներից: Բորելն իր հերթին ընդունել է, որ կա որոշակի լարվածություն Թուրքիայի հետ հարաբերություններում, բայց նաև նշել է, որ Եվրամիությունը «շարունակում է մի շարք ընդհանուր շահեր ունենալ Անկարայի հետ»:
Պատրաստեց՝ Վիկտորյա ԱՆԴՐԵԱՍՅԱՆԸ
