Ամռանն ու աշնանը մրգային թեթեւ թխվածքներից համեղ բան չեմ պատկերացնում: Այս անգամ առաջարկում եմ ֆրանսիական բաց մրգային կարկանդակի՝ գալեթի բաղադրատոմսը: Խմորը պարզ ծեծած խմոր է, որով պատրաստում ենք նաեւ ֆրանսիական տարտերը, տարտալետկաները, այլ կարկանդակները: Միջուկը՝ կտրատած մրգեր: Իր պարզությամբ հանդերձ՝ շատ նուրբ, փխրուն եւ համեղ թխվածք է:
Անհրաժեշտ մթերքները
Ալյուր-մոտ 2 բաժակ
Շաքարավազ-1 ճաշի գդալ+1 ճաշի գդալ
Կարդացեք նաև
Կարագ -150 գրամ
Սառցաջուր-2 ճաշի գդալ
Դեղձ-1 հատ
Նեկտարին-1 հատ
Մոշ-10-15 հատիկ
Ձու-1 հատ
Պատրաստման եղանակը
Ջեռոցը տաքացրեք 190 աստիճան:
Կարագը պետք է լինի շատ սառը, անմիջապես սառնարանից: Կարող եք քերիչով քերել, կարող եք դանակով կտրատել:
Խառնել 1,5 բաժակից մի քիչ ավելի ալյուրի եւ 1 ճաշի գդալ շաքարավազի հետ, մինչեւ փշուրների վերածվի, ապա ավելացնել մեկ գդալ սառցաջուր, խառնել խմորը, եթե հավաքվի, գնդվի, ուրեմն պատրաստ է, եթե՝ ոչ, ապա եւս մեկ գդալ ջուր ավելացրեք:
Սեղանի վրա ցանեք մնացած ալյուրը, խմորը լցրեք վրան եւ թեթեւակի հունցեք, մինչեւ հավաքվի, դառնա գունդ, շատ հունցելու կարիք չկա: Գրտնակեք շրջանաձեւ, դրեք տապակի վրա, որի վրա յուղթերթ է փռված:
Խմորի վրա, եզրից 2 մատ խորությամբ շարեք կտրատած դեղձը, նեկտարինը, վրան շարեք մոշը: Մրգերի վրա շաքարավազ ցանեք: Խմորը եզրերից հավաքեք: Խմորի վրա հարած ձու քսեք: Դրեք տաք ջեռոցը մոտավորապես 30-40 րոպեով, մինչեւ խմորը ոսկեգույն դառնա:
Երբ պատրաստ լինի, հանեք ջեռոցից, թողեք հովանա, որից հետո շաքարի փոշի ցանեք վրան եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
