Ներկա պատերազմը, որի գինը վճարում են տարածաշրջանի ժողովուրդները, շարունակությունն է հետսառըպատերազմյան Ռուսաստանի շուրջ հրե օղակ ստեղծելու և անդամահատելու մեծ պատերազմի: Այն նոր փուլ մտնելու շեմին է՝ հոկտեմբերի 30-ի՝ Վրաստանի համապետական և նոյեմբերի 3-ի՝ ԱՄՆ նախագահական ընտրությունների ֆոնին:
Ռուսաստանում ձեռք բերված այս հրադադարն առաջին հերթին հենց ռուսական կողմին է հասցեագրված: ՌԴ-ի պետական ինստիտուտները հրադադարի ընթացքում կա՛մ իրենց սահմանից միջազգային ահաբեկչությունը կհասցնեն հեռացնել և իշխանափոխություններ իրականացնել մասնավորապես Ադրբեջանում, կա՛մ Ռուսաստանը մեկընդմիշտ կհեռանա տարածաշրջանից՝ այն թողնելով կենաց-մահու քաոսի մեջ:
Ի դեմս Ռուսաստանի՝ չունենք հուսալի դաշնակից, քանի որ ինքն է կանգնած խոշոր ցնցումների եզրին: Ի դեմս ԱՄՆ ներկա վարչակազմի՝ չունենք հուսալի դաշնակից, քանի որ Կովկասում Ռուսաստանի դեմ իր քայլերն անում է ահաբեկչությունը պատերազմի մեջ ներքաշող Թուրքիայի ձեռքով: Ի դեմս Եվրոպայի՝ չունենք հուսալի դաշնակից, քանի որ արժեքային իր դավանանքին հավատարիմ լինելով հանդերձ՝ զուրկ է ազդեցիկ լծակներից: Եվ միայն Ֆրանսիայի հստակ դիրքորոշումն անզոր է դեպքերի ընթացքի վրա. դա տեսանք կիպրական ափերի մոտ վերջին զարգացումների ժամանակ:
Ներհայկական ամեն մի փոխադարձ անվստահություն՝ թե՛ իշխանությունների և թե՛ իշխանազրկվածների կողմից, ռազմական դրության պայմաններում ցանկացած պարտազանցություն, ժամկետանց յուրաքանչյուր նացիոնալ-ռոմանտիզմ կամ նիհիլիզմ կարող են ճակատագրական լինել գոյութենական այս կռվում, ուստի ներազգային ուժերի գերլարումն է մեր միակ հուսալի դաշնակիցը:
Կարդացեք նաև
Ճակատագրի բերմամբ՝ մեր հայրենակտորն ու ազգը հայտնվել են քաղաքակրթական արյունալի դիմակայության առաջնագծում և ունեն պատմական առաքելություն հայ ժողովրդի հավերժականության և քաղաքակիրթ մարդկության ապագայի առջև:
Հակաահաբեկչական և Հայրենական այս պատերազմում պարտավորված ենք հաղթել և միմիայն հաղթել:
Միքայէլ ՀԱՅՐԱՊԵՏԵԱՆ (Պահպանողական կուսակցություն)
Պետրոս ՄԱԿԵՅԱՆ («Ժողովրդավարական հայրենիք» կուսակցություն)
