ՆԱՏՕ-ի գլխավոր քարտուղարի տեղակալի անդրադարձը Լեռնային Ղարաբաղի հակամարտությանը
Հոկտեմբերի 26-ին Բրյուսելում ռումինացի լրագրողների հետ կայացած առցանց ճեպազրույցի ժամանակ Ռումինիայի նախկին ԱԳ նախարար, ներկայումս ՆԱՏՕ-ի գլխավոր քարտուղարի տեղակալ Միրչեա Ջեոանան (Mircea Geoană) անդրադարձել է նաև Լեռնային Ղարաբաղի հակամարտությանը:
Միրչեա Ջեոանան իր խոսքում նշել է, որ Մինսկի խումբը, որը ԵԱՀԿ շրջանակներում հստակ իրավասություն ունի Լեռնային Ղարաբաղի հարցում, միջնորդություն է իրականացնում: Կրկնելով իրավիճակը մեղմելուն միտված իր կոչը՝ ուղղված բոլոր ուժերին՝ ներառյալ նրանց, ովքեր ուղղակի կամ անուղղակի ազդեցություն ունեն հակամարտության կողմերի վրա, նա հավելել է. «Տեսնենք, թե արդյոք իրավիճակը մի փոքր կկայունանա»:
Նա նաև նշել է, որ այն հակամարտությունները, որոնք ավելի բարդ աշխարհաքաղաքական համատեքստում համարվում են սառեցված, կարող են հանկարծ թեժանալ և վերածվել բացահայտ բախումների:
Կարդացեք նաև
Ըստ Մ․ Ջեոանայի, դա զգոն լինելու դաս և կոչ է սառեցված հակամարտությունների համատեքստում, որոնք, ցավոք, մեծ թիվ են կազմում նախկին Խորհրդային կայսրության տարածքում և շատ կարևոր են եվրոպական անվտանգության համար։
