Բուռն քննարկվում և լրատվամիջոցներով անընդհատ լուսաբանվում են «Հայաստան» համահայկական հիմնադրամից 52 մլրդ դրամ գումար ՀՀ պետական բյուջե փոխանցելու ու այդ առնչությամբ միջազգային աուդիտի բացասական արձագանքին և դիրքորոշմանն արժանանալու հիմնախնդիրները: Նշվում է նաև, որ իբրև թե հնարավոր չէ տարանջատել այդ գումարի ծախսերն այլ ծախսերից, ուստի գործընթացը աուդիտի չի կարող ենթարկվել…
ՀՀ պետական վերահսկողության, աուդիտի և հաշվեքննության բնագավառում երկարատև աշխատանքային ստաժ ունենալով հանդերձ` որևէ կերպ չեմ պատկերացնում, թե ինչպե՞ս հնարավոր չէ տարանջատել ծախսերը, քանզի դա ցանկացած հմուտ աուդիտոր կարող է անել` ընդհուպ մինչև մանրամասնելով վերջին «լումա»-ն տնօրինողին ու օգտագործողին:
Իսկ «Հայաստան» համահայկական հիմնադրամից ՀՀ պետական բյուջե գումար փոխանցելու և այնուհետև ՀՀ պետական բյուջեից այդ գումարը ծախսելու գործընթացի աուդիտը Հայաստանի Հանրապետության արտաքին պետական աուդիտի` Հաշվեքննիչ պալատի, Սահմանադրությամբ և օրենքներով ամրագրված առաջնային սուրբ պարտականությունն է: Ուստի, ես տարակուսած եմ, որ այսպիսի մեծ հնչեղություն ստացած հարցում ՀՀ Հաշվեքննիչ պալատի կողմից անգործություն է ցուցաբերվում, ինչն ուղղակի անթույլատրելի է…
Արամ ՄԱՄԻԿՈՆՅԱՆ,
իրավագետ
