«Սա շինծու գործ է»,- Radar Armenia-ի ձայնային ուղիղ եթերում հրավիրված տելեգրամյան մամուլի ասուլիսի ընթացքում հայտարարեց քաղաքական գործիչ, նախկին ՊՎԾ պետ Դավիթ Սանասարյանը։
Նա վստահեցրեց՝ այդ գործը որևէ կապ չունի իրականության հետ. «Իմ մասով առնվազն առաջիկայում մեր քաղաքացիները ականատես կլինեն, որ առանց ապացույցի այս սկանդալը սարքեցին: Այն կարևոր գործառույթը, որ իրականացնում էինք իմ աշխատակիցների հետ միասին, կասեցվեց»:
Դավիթ Սանասարյանի համար նաև անընդունելի է, որ ՊՎԾ-ի ֆեյսբուքյան էջը փակվել է:
Նա հայտարարեց՝ ինչ արել են, պետությունը շահել է հարյուրավոր միլիոններ: Այսպես կոչված «դիալիզի գործի» մասին որոշ մանրամասներ ներկայացրեց. «Արսեն Թորոսյանը ինձ տեղեկացրել է, որ դա իմ աշխատողների կազմակերպությունն է, փորձել է ճշտել՝ նման բան կա, ինձ ասել են, որ նման բան չկա, դա ես տեղեկացրել եմ Արսեն Թորոսյանին»:
Կարդացեք նաև
Դավիթ Սանասարյանը նշեց, որ մի նուրբ հարց կա, որին ուզում է, որ Արսեն Թորոսյանը պատասխանի. «Սպասում եմ՝ Արսեն Թորոսյանը գա դատարան: Վստահ եմ՝չի կարողանալու այդ հարցին պատասխանել: Երբ մամուլում գրվեց դիալիզի գործի մասին, Արթուրի Վանեցյանին առաջարկեցի, որ միասին այդ գործն առաջ տանենք, նաև իրավապահ մարմինը զբաղվի և պետական վերահսկողական ծառայությունը: Արթուր Վանեցյանն ասաց՝ վարչապետի հետ խոսեմ, ասեմ: Վարչապետի հետ խոսել էր, և հետո տեղի ունեցավ այն, ինչ տեղի ունեցավ: Խնդիրն այն էր, որ ապրանքը ՀՀ ներմուծում էին, 2,2 անգամ թանկ գնով վաճառում էին պետությանը»:
Հարցին՝ իսկ ովքե՞ր էին քրեական գործը սարքել, Դավիթ Սանասարյանը պատասխանեց. «Չգիտեմ ՝ ռեալ պատվիրատուները ովքեր էին, բայց թե ովքեր էին կատարողները, պարզ էր: Ունեմ իմ կասկածները, բայց քանի որ դատական գործընթաց է, չեմ ուզում հայտնել: Այն, որ այս գործում կան Արսեն Թորոսյան և Արթուր Վանեցյան, բոլորին հայտնի է: Այլ պատասխանատուների հետ կապված ունեմ կասկածներ, բայց չեմ կարող այս պահին հնչեցնել»:
Իսկ թե ինչո՞ւ պետք է ձեռնտու լիներ Արսեն Թորոսյանին, որ այս գործը բացվեր, չէ՞ որ նույն թիմից էին,Դավիթ Սանասարյանը պատասխանեց. «Պետք է ուսումնասիրություններ իրականացվեին առողջապահական համակարգում: Միգուցե Արսեն Թորոսյանն անհանգստություն ուներ, որ շատ բան ջրի երես դուրս կգա»:
Նա տեղեկացրեց՝ արդեն հայտ են ներկայացրել «Ինքնիշխան Հայաստան» կուսակցության գրանցման: Ապրիլի 23-ին լինելու է առաջին համագումարը»:
Տաթև ՀԱՐՈՒԹՅՈՒՆՅԱՆ
Արյունը մաքրելու պրոցեսը կոչվում է ” դիալիզ”:
Շնորհակալություն, ուղղեցինք: