ՀՀ 2-րդ նախագահ Ռոբերտ Քոչարյանի կարծիքով՝ դեռ ամեն ինչ կորած չէ, բանակցային գործընթացում հնարավորություն կա քննարկելու նախկին ԼՂԻՄ կազմի մեջ մտնող տարածքների հարցը: Այս մասին Քոչարյանն ասել է ռուսական Առաջին ալիքի «Պոզներ» հաղորդման եթերում։
Պոզների հարցին՝ կարծո՞ւմ եք արդյոք, որ Լեռնային Ղարաբաղի կորցրած տարածքները կորսված են ընդմիշտ, դրանք այլեւս հնարավոր չէ վերադարձնել Քոչարյանը պատասխանել է․ «Բոլոր տարածքների մասին ես հաստատապես չէի խոսի։ Ամեն ինչ կորսված չէ, կա հնարավորություն, համենայնդեպս, բանակցային գործընթացում քննարկելու ԼՂԻՄ կազմի մեջ մտնող տարածքների հարցը։ Ի՞նչ կարգավիճակով եւ ինչպե՞ս, դա շատ բարդ գործընթաց է։ Բայց կարծում եմ, որ այստեղ ինչ-որ հնարավոր հեռանկարներ կան»։
Իշխանության գալու դեպքում ռեւանշի հնարավորության մասին հարցին էլ՝ Քոչարյանն ասել է՝ հայկական բանակն ու Հայաստանն այժմ այնպիսի իրավիճակում են, որ ցանկացած սթափ մտածող մարդ չի կարող մտածել ռեւանշի մասին։
«Բայց չափազանց անարդար աշխարհը չի կարող երկար եւ հավերժ լինել: Ուստի իրավիճակին պետք է նայել հետեւյալ կերպ՝ եթե մենք իրոք ուզում ենք վերջ դնել այս հակամարտությանը, ապա պետք է գտնել այնպիսի լուծում, որը արդարության տեսանկյունից կլինի բավականին ընկալելի»։
Կարդացեք նաև
Ռոբերտ Քոչարյանն այսօր նույն հաղորդման ժամանակ ասել է, որ ԱԺ արտահերթ ընտրություններին կմասնակցի կուսակցությունների դաշինքով։
Նելլի ԲԱԲԱՅԱՆ
