Խաչատուր Աբովյանի անվան հայկական պետական մանկավարժական համալսարանը մինչեւ այժմ որեւէ դիրքորոշում չէր արտահայտել բուհերի կառավարման բարձրագույն մարմիններում՝ հոգաբարձուների խորհուրդներում ներկայացված անդամների համամասնության փոփոխությանը վերաբերող կառավարության որոշման մասին:
ԵՊՀ-ն, ինչպես հայտնի է, խիստ ընդդիմանում է այդ որոշմանը եւ նույնիսկ հայտարարել է դատական կարգով բողոքարկելու վճռականության մասին, նաեւ դիմել ՄԻՊ-ին՝ ՍԴ-ում այդ հարցը քննարկման առարկա դարձնելու համար:
Այնինչ, ընդունված որոշումը, ԵՊՀ-ից բացի վերաբերում է նաեւ Շիրակի պետական ու Մանկավարժական համալսարաններին: Քննարկումների, քննադատությունների այս հոսքի մեջ, սակայն, վերջին երկու բուհերը լռություն էին պահպանում: Համենայնդեպս՝ հրապարակային ոչ դրական, ոչ էլ բացասական կարծիք չլսեցինք:
ՇՊՀ-ից «Հայկական ժամանակին» ասել են, որ սպասում են ՍԴ որոշմանը, որին էլ կհետեւեն որպես օրինապահ քաղաքացի: Նշել են նաեւ, որ բուհն արդեն յոթ ամիս հոգաբարձուների խորհուրդ չունի:
Կարդացեք նաև
Ինչ վերաբերում է Մանկավարժական համալսարանին, ռեկտոր Ռուբեն Միրզախանյանին ուղղված մեր հարցերի պատասխանը փոխանցեցին բուհի լրատվության եւ հանրության հետ կապերի վարչությունից:
– Պարոն Միրզախանյան, ինչպիսի՞ն է ՀՊՄՀ-ի դիրքորոշումը՝ բուհերի վերաբերյալ Կառավարության նոր որոշման մասին:
– Փիլիսոփայական:
– Իսկ առաջարկվող համամասնությունը վնասո՞ւմ է բուհական ինքնավարությանը: Խորհրդի կազմում՝ պրոֆեսորադասախոսական կազմից 2 անդամ ունենալու հանգամանքը ինչպե՞ս կգնահատեք:
– Հետաքրքրական:
– Բուհական ներկայացուցիչների հիմնական մտահոգություններից է նաեւ այն, որ ունենալով ձայների գերակայություն՝ Կառավարությունը ռեկտորի պաշտոնում «իր ուզած մարդուն» կնշանակի. այստեղ որեւէ խնդիր տեսնո՞ւմ եք:
– Կառավարության հետ կապված խնդիր չենք տեսնում:
Հոդվածն ամբողջությամբ՝ «Հայկական ժամանակ» թերթի այս համարում
