«Ի՞նչ է նշանակում իմ շնորհիվ: Ես ոչ իրենց ծնողն եմ, ոչ էլ ծնողական ժողովի նախագահը, իրենք իրենց ուժերով դարձել են այդպիսի դեմքեր, ես չեմ ծնել ոչ մեկին»,-այսօր հրավիրված ասուլիսում այսպես արձագանքեց 1-ին նախագահ Լեւոն Տեր-Պետրոսյանը տարածված պնդմամւ, թե Ռոբերտ Քոչարյանն ու Սերժ Սարգսյանը Նիկոլ Փաշինյանն ասպարեզ են եկել իր շնորհիվ։
Արդյոք դեռ պատրա՞ստ է համագործակցել Սերժ Սարգսյանի ու Ռոբերտ Քոչարյանի հետ, ինչպես որ վերջերս առաջարկել էր՝ միասին մտնել ընտրական պայքարի մեջ՝ Փաշինյանին հեռացնելու համար, այս հարցին ի պատասխան էլ պարոն նախագահն ասաց․ «Պարզ է, որ իմ առաջարկը մերժվել է, եւ այլեւս դրան վերադառնալ հնարավոր չէ։ Ուրիշ բան, եթե խորհրդարանում այնպիսի իրավիճակ ստեղծվի, մենք էլ անցնենք, Նիկոլն է, Ռոբերտն էլ, ուրիշներն էլ, որեւէ մեկը մեծամասնություն չունենա, ստիպված պետք է գնանք կոալիցիաներ ձեւավորելու։ Մենք կնայենք, կտեսնենք, ես միշտ կողմ եմ համերաշխության կոալիցիաների»։
Ճշտող հարցին՝ եթե Ազգային ժողվում լինեն Քոչարյանի ղեկավարած դաշինքն ու Նիկոլ Փաշինյանի քաղաքական ուժը, եւ եթե վարչապետ ընտրելու հարց լինի, Կոնգրեսն ո՞ւմ հետ դաշինք կկազմի, Լեւոն Տեր-Պետրոսյանը պատասխանեց․ «Գիր-ղուշ կգցենք, կորոշենք։ Դա հիմիկվա խոսելու բան չէ։ Կստեղծվի նոր իրավիճակ, եւ մենք լուրջ կվերաբերվենք այդ իրավիճակին, կփորձենք սխալ որոշում չկայացնել»։
Նելլի ԲԱԲԱՅԱՆ
