«Իրիկունը ժամը 11.30-ի կողմերն էր, հասանք Չայզամիի կողմերը, ոստիկանները կանգնացրին, ասին պետք է մի քիչ սպասեք։ Մի երկու ժամից հետո, ասացին ավտոյի պատուհանները փակ պահեք ու արագ անցեք»,–պատմում է կապանցի Մարինե Կարապետյանը, որը երեկ՝ օգոստոսի 25-ին Երեւանից Կապան էր վերադառնում։ Հիշեցնենք, որ ադրբեջանցիները շարունակում են փակ պահել Երեւան-Մեղրի միջպետական ավտոճանապարհի Չայզամի-Շուռնուխ-Որոտան հատվածը։
Հակառակորդի հետ բանակցությունները վերսկսվել են հինգշաբթի ժամը 16-ից եւ մինչեւ այս պահը շարունակվում են։ Հայաստանի Զինված ուժերի ներկայացուցիչների հետ բանակցություններին մասնակցում են ռուս սահմանապահները։ Հիմնական ճանապարհը փակելով, սակայն, Սյունիքը մասնավորապես, Կապանը չի կտրվել արտաքին աշխարհից։
Երթեւեկությունը անխափան գործում է Աղվանի-Տաթեւ այլընտրանքային ճանապարհով։ Այս ճանապարհն արագ տեմպերով հիմնանորոգվում է, բայց այս պահին դժվարանցանելի էր բեռնատար ավտոմեքենաների համար։ Բեռնատարները շարունակում են կանգնած մնալ Երեւան-Կապան միջպետական հիմնական ճանապարհի Կարմրաքարի եւ Գորիսի հատվածներում։ Ազգային ժողովի պատգամավոր Դավիթ Դանիելյանը Aravot․am-ի հետ հեռախոսազրույցում նշեց, որ թվային ցուցանիշներով չի կարող ասել, թե քանի ավտոմեքենա է կուտակվել։
Կարդացեք նաև
«Ոստիկանության ուղեկցությամբ փորձնական մեկ բեռնատար շարժվել է Տաթեւ–Աղվանի–Կապան ճանապարհով։ Եթե ստացվի, ապա կթույլատրվի մնացած բեռնատարների շարժը այլընտրանքային այդ ճանապարհով»,–ասաց պատգամավորը։
Ի դեպ, տեսանյութը մեզ է տրամադրել Դավիթ Դանիելյանը:
Արմեն ԴԱՎԹՅԱՆ
