ԱԺԲ խորհրդի անդամ, քաղաքագիտության դոկտոր Հայկ Մարտիրոսյանը մեկնաբանեց Նիկոլ Փաշինյանի բազմիցս կրկնած այն հայտարարությունը, թե Հայաստանը պատրաստակամ է կոմունիկացիաներն ապաշրջափակել, ինչը տեւական խաղաղություն կբերի տարածաշրջան, որ ադրբեջանցիները եւ հայերը կկարողանան փոխադարձաբար անվտանգ օգտվել երկու երկրների ճանապարհներից:
«Նիկոլ Փաշինյանը իրավունք չունի Հայաստանի անունից խոսել եւ համաձայնություն տալ կոմունիկացիաների ապաշրջափակմանը: Նա լեգիտիմ առաջնորդ չէ: Նա ընդհանրապես առաջնորդ չէ: Նա ռեժիմի պարագլուխն է եւ իրավունք ունի խոսելու լավագույն դեպքում իր խմբակի անունից: Հետեւաբար, դրանք ապօրինի հայտարարություններ են, որովհետեւ նա չի ներկայացնում Հայաստանի շահերը:
Տեսեք, նա հայտարարում է, թե հայերն ու ադրբեջանցիները կարող են անվտանգ օգտվել միմյանց ճանապարհներից, ինչը տեւական խաղաղություն հաստատելու գրավական է: Բայց ինքը վախեցավ օրերս Սյունիք գնալ Գորիս-Կապան այն ճանապարհով, որի 21 կիլոմետրը նվիրել է Ադրբեջանին: Եվ դա այն դեպքում, երբ մենք գիտենք, թե իրեն ինչպիսի մեծ զորք է ուղեկցում: Նիկոլ Փաշինյանի անվտանգությունը ապահովում են ՊՊԾ ավելի մեծ թվով աշխատակիցներ, քան երբեւէ Հայաստանի ղեկավար պաշտոն ունեցած մեկ այլ անձի են պաշտպանել: Նա իր բանակով եւ զորքով վախեցավ անցնել այդ ճանապարհով, փոխանակ առաջինն ինքը անցներ, ընդ որում, քայլելով՝ ցույց տալու համար, որ դա ապահով է: Բայց դա ապահով ճանապարհ չէ, դա թշնամուն հանձնված, թշնամու կողմից վերահսկվող ճանապարհ է, որի վրա ինչ ասես կարող է լինել: Եվ սա ցույց է տալիս, որ ինչպիսին նրա խոսքի եւ գործի անհամապատասխանությունն է, այնպես էլ ամբողջ երկրի հետ տարվող կործանարար քաղաքականության դեմքն է, ինչը ցավոք, ոչ բոլորն են տեսնում»,- ասաց մեր զրուցակիցը:
Աշոտ ՀԱԿՈԲՅԱՆ
