Հայաստանում ԱՄՆ դեսպանի եւ ԵՊՀ ռեկտորի պաշտոնակատար Հովհաննես Հովհաննիսյանի համատեղ ասուլիսի ժամանակ Oragir.news-ի լրագրողը հարց ուղղեց Հովհաննես Հովհաննիսյանին՝ արդյոք նա պատրա՞ստ է հանուն ԵՊՀ շահի եւ Մայր բուհի հեղինակության, հրաժարվել ԵՊՀ ռեկտորի թափուր տեղի համար անցկացվող մրցույթին մասնակցելուց, որտեղ միակ թեկնածուն է:
Լրագրողը հիշեցրեց, որ Հովհաննես Հովհաննիսյանի դոկտորական ատենախոսության հետ կապված խնդիրներ կան, ԲՈԿ-ի դեմ դատական գործընթացներ են ընթանում, ինչի արդյունքով հնարավոր է զրկվի գիտական աստիճանից, կառավարությունը հատուկ իջեցրել է ռեկտոր ընտրվելու համար անհրաժեշտ չափանիշների շեմը, ինչի արդյունքում Հովհաննես Հովհաննիսյանը նշանակվել է ԵՊՀ ժամանակավոր պաշտոնակատար, ինչը քննվում է վարչական դատարանում, նաեւ ՍԴ-ում ՄԻՊ-ի նախաձեռնությամբ քննվում է Հովհաննես Հովհանիսյանի՝ ԺՊ նշանակվելու իրավակարգավորման սահմանադրականությունը:
«Չնայած հարցը կապ չուներ օրակարգի հետ, բայց դուք սովոր եք ամեն տեղ հայտնվել ու փչացնել օրվա խորհուրդը»,-ասաց ռեկտորի պաշտոնակատարը՝ լրագրողին մեղադրելով ուղղորդված լինելու եւ սուտ մատնության մեջ: «Դրա համար կան քրեական գործեր, այս հայտարարությունը եւս կավելացնենք դրան: Ես որեւէ բան չունեմ ավելացնելու ձեր նշածին: Դուք որերորդ անգամ հայտնվել եք, որպեսզի սկանդալ սարքեք, վնասեք ԵՊՀ-ի հեղինակությանը… ԵՊՀ-ն դա բոլորիս տունն է, հպարտությունն է, հետայսու սա լինելու է մեր ուղեգիծը»,-ասաց Հովհաննես Հովհանիսյանը:
Գոհար ՀԱԿՈԲՅԱՆ
