Իտալական այս թխվածքաբլիթը կարող է գրեթե մեկ ամիս պահպանվել՝ առանց փոխելու որակական հատկությունները: Այն շատ չոր է, քանի որ կրկնակի է թխվում, այստեղից էլ՝ նրա անվան տարածված biscotti տարբերակը: Այս թխվածքաբլիթներն ընդունված է ուտել՝ թաթախելով որեւէ հեղուկի մեջ՝ սուրճի, թեյի, կամ, ինչպես Իտալիայում է ընդունված՝ քաղցր սպիտակ գինու՝ vin santo-ի:
Կանտուչիի տարատեսակները շատ են, երբեմն այն պատրաստում են առանց կարագի, երբեմն ավելացնում են չրեղեն, ընկուզեղենի տեսակներ, նարնջի կամ կիտրոնի կեղեւ, շոկոլադի կտորներ, կտրում են տարբեր ձեւերով: Այստեղ ներկայացնում ենք քիչ թե շատ դասական եւ շատ համեղ տարբերակներից մեկը:
Անհրաժեշտ մթերքները
Ձու-3 հատ
Կարդացեք նաև
Ալյուր-500 գրամ
Շաքարավազ-200-250 գրամ
Կարագ-150 գրամ
Նուշ- 200 գրամ
Սոդա-1 թեյի գդալ
Աղ-1 պտղունց
Նուշի կամ վանիլի մզվածք – մի քանի կաթիլ (պարտադիր չէ)
Պատրաստման եղանակը
Խառնում ենք բոլոր մթերքները, բացի նուշից, դառնում է բավականին պինդ խմոր: Կարող եք դնել սառնարան՝ 10-15 րոպեով, որ ավելի ենթարկվող դառնա, սակայն, եթե ժամանակ չունեք՝ պարտադիր չէ: Այնուհետեւ խմորին ենք խառնում նուշը: Խառնում ենք այնքան, որ նուշն ամբողջությամբ ներառվի խմորի մեջ:
Ջեռոցը միացնում ենք 180 աստիճան: Ջեռոցի տապակի վրա յուղաթուղթ ենք փռում: Մեր խմորը բաժանում ենք 4 մասին եւ գլանակի տեսք ենք տալիս: Այդ չորս գլանակները դնում ենք տապակի վրա եւ դնում ջեռոց: Եթե ցանկանում եք, կարող եք գլանակների վրա ձու քսել, սակայն, ըստ իս, դրա կարիքն ամենեւին չկա:
25-30 րոպե հետո խմորը հանում եք ջեռոցից, որոշակի շեղությամբ կտրատում, ապա այդ կտորները կրկին շարում յուղաթղթի վրա եւ եւս 10 րոպեով դնում ջեռոցը: 10 րոպեն լրանալուց հետո շուռ տվեք կանտուչինիները, եւ եւս 5-10 րոպե թողեք ջեռոցում:
Երբ թխվի, վերջանա, թողեք մի փոքր սառչի, ապա մատուցեք: Կարող եք տեղավորել ապակյա հերմետիկ փակվող տարայի մեջ, եւ այդպես այն բավականին երկար ժամանակ թարմ կմնա:
Մանրամասները՝ տեսանյութում.
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
