«Ձեր զեկույցում ասացիք, որ երկու ՔԿՀ-ներ փակվել են, եւ որ «Կոշ» ՔԿՀ-ն 167 աշխատակից ուներ։ Այդ մարդկանց ճակատագրին ծանո՞թ եք, գործազո՞ւրկ են հիմա»,- ԱԺ մարդու իրավունքների պաշտպանության եւ հանրային հարցերի հանձնաժողովի նիստում այսօր ՀՀ կառավարության ծրագրի 2021թ․-ի կատարման ընթացքի եւ արդյունքների մասին զեկույցի քննարկման ժամանակ արդարադատության նախարար Կարեն Անդրեասյանին հարցրեց «Քաղաքացիական պայմանագիր» խմբակցության պատգամավոր Մարինա Ղազարյանը։
«Նրանց գերակշիռ մեծամասնությունը գործազուրկ չի դարձել, մի անհանգստացեք։ Մեծ մասը տեղափոխվել է այլ ՔԿՀ-ներ։ Փակելուն զուգահեռ մենք հիսուն հաստիք ենք ավելացրել պրոբացիոն ծառայությունում, եւ իրենք հնարավորություն կունենան մասնակցել մրցույթներին։ Ռեզերվում են»,-նախ նշեց Կարեն Անդրեասյանը։
Նրա խոսքով՝ անգամ եթե այդ անձինք աշխատանքը կորցնեին, կդիտարկվեր երկու արժեք՝ աշխատատեղը կամ արդյունավետ աշխատանքը․ «Ցավալի է հնչում, բայց ընտրելու էինք օպտիմալացումը։ Հնարավոր է, որ այլ հաստիքներ էլ կրճատվեն։ Հնարավոր չէ պետությունից պահանջել խնայողություն եւ արդյունավետություն, մյուս կողմից՝ բոլորը դառնան իրավապաշտպան ու ասեն, թե ինչու ենք մարդկանց առանց աշխատանքի թողնում։ Չենք կարող սուտ, կեղծ, փուչ հաստիքներ պահել։ Սա չի վերաբերում ձեր հարցին»։
Լուիզա ՍՈՒՔԻԱՍՅԱՆ
