Այն, ինչ տեղի է ունենում Ուկրաինայում, քաղաքագետ Գրիգոր Բալասանյանն աղետ է համարում, քանի որ Ուկրաինան եւ Հայաստանն ամեն ինչից զատ՝ նաեւ ընդհանուր անցյալ ունեն: Բայց միաժամանակ, նա նկատում է, որ ժամանակակից միջազգային հարաբերությունները միշտ առաջնորդվել են մի քանի սկզբունքներով, դրանցից մեկն էլ այն է, պետությունները պետք է կատարեն իրենց ստանձնած պարտավորությունները: Իր կարծիքը քաղաքագետը բարձրաձայնեց այսօր «Միջազգային հումանիտար զարգացման» հասարակական կազմակերպության կազմակերպած կլոր սեղան-քննարկման ժամանակ:
Քաղաքագետը մանրամասնում է, որ Ուկրաինայում այսօր տեղի ունեցողը 1997 թվականին, Փարիզում ստորագրված փաստաթղթի խախտումն է ՆԱՏՕ-ի կողմից եւ Ռուսաստանն արդեն իսկ մատնանշել է, որ խախտվում են կարմիր գծեր. «Այդ պայմանագիրը կանխորոշում էր ՌԴ-ՆԱՏՕ հետագա հարաբերությունների ընթացքը, վարքականոններ էր սահմանում, որոնք չպետք է խախտվեն: Բայց խախտվեցին»:
Բանախոսը բնական է համարում, որ աշխարհաքաղաքական եւ տարածաշրջանային ստեղծված իրավիճակը չի շրջանցում նաեւ Հայաստանին. «Այն սպառնալիքները, որ հնչում են ՀՀ-ի հասցեին, այդ թվում եւ ԵԱՏՄ-ին անդամակցելու առումով, մտահոգիչ են եւ արտաքին քաղաքականության պատասխանատուները դրան պետք է շատ լուրջ մոտեցում ցուցաբերեն: Օրինակ, Ուկրաինայի գործերի ժամանակավոր հավատարմատարը պետք է հրավիրվի ԱԳՆ, քանի որ մեկ անգամ չէ, որ փորձ է արել միջամտել մեր ներքին գործերին»:
Քաղաքագետը նաեւ վստահ է, որ Արցախում հենց Թուրքիայի հրահանգով է հրահրված վերջին սադրանքը Քարագլխի շուրջ, որպեսզի Թուրքիայում ռուսական կողմը գնա զիջումների եւ մեղմացնի ուկրաինական կողմին ներկայացվող վերջնագիրը, քանի որ այսօր Ստամբուլում ընթանում են ռուս-ուկրաինական բանակցությունները. «Անկարան ոչ միայն չի թաքցնում, որ ունի պրոուկրաինական նկրտումներ, զենք է վաճառում Կիեւին, այլեւ լավ օգտագործում է դա՝ իր շահերն առաջ մղելու համար: ՀՀ-ն պետք է լավ ուսումնասիրի թշնամու քաղաքականությունը եւ գուցե նաեւ կիրառի այս խորամանկության ու դիվանագիտության սինթեզ»:
Կարդացեք նաև
Այլ մանրամասները՝ տեսանյութում
Նելլի ԳՐԻԳՈՐՅԱՆ
