Խորհրդարանական ընդդիմության կազմակերպած հանրահավաքի մասնակիցները «Ազատության» հրապարակից քայլերթով գնացին Ֆրանսիայի հրապարակ եւ Օգյուստ Ռոդենի հեղինակած Ժյուլ Բաստիեն Լըպաժի արձանի մոտ եւ գազոնում կանգնեցրին Արցախի Հանրապետության դրոշը: Արձանը Ֆրանսիայի նախկին նախագահ Նիկոլյա Սարկոզին անկախացման 20-ամյակի առթիվ նվիրել է Հայաստանի Հանրապետությանը:
Արարողությանը մասնակցող ՀՀ պաշտպանության նախկին նախարար, Արցախի հերոս Սեյրան Օհանյանի աչքերը փայլում էին: Aravot.am-ը գեներալ գնդապետից հարցրեց, թե ի՞նչ է ազգում Արցախի դրոշը բարձրացնելիս: «Արցախի նկատմամբ հպարտության զգացում, Հայաստանի համար հպարտության զգացում: Նաեւ պատասխանատվություն Հայաստանի եւ Արցախի ճակատագրի վերաբերյալ: Վճռականություն այն թշնամական վերաբերմունքին, որ կա թշնամիների եւ այն մարդկանց կողմից, որոնք չեն հասկանում, թե ինչ է նշանակում իսկական արժանապատիվ խաղաղություն»,-պատասխանեց Սեյրան Օհանյանը:
Աշոտ ՀԱԿՈԲՅԱՆ
