ՀՀ երկրորդ նախագահ Ռոբերտ Քոչարյանի որդու՝ Լեւոն Քոչարյանի եւ «Հայաստան» խմբակցության պատգամավոր Արամ Վարդեւանյանի գլխավորած ընդդիմադիրների երթը մեկնարկել էր «Դալմա մոլ»-ի մոտից, ցուցարարները շարժվում էին դեպի Հաղթանակի կամուրջ, ապա երթի մասնակիցները գնալու էին Ֆրանսիայի հրապարակ, ինչի մասին երթն առաջնորդողները տեղեկացրին ուղեկցող ոստիկաններին:
Տեւական ժամանակ խաղաղ երթը շարժվում էր առաջ՝ «Պայքար, միացում» վանկարկումներով եւ ռազմահայրենասիրական երգերի ներքո:
«Հրազդան» մարզադաշտի մոտ, ինչ-որ պահի, անհասկանալի պատճառով, իրավիճակը լարվեց, հրմշտոց սկսվեց: «Ձեզ խելոք պահեք, արա»,- բղավում էր ցուցարարներից մեկը՝ հավանաբար դիմելով ոստիկաններին, որոնք շատ արագ եւ բավական ագրեսիվ կերպով սկսեցին քաշքշել երթի մասնակիցներին:
Բավական արագ ժամանեցին մեծ թվով ոստիկաններ, այդ թվում սեւ բերետավորներ, նրանք սկսեցին անհամաչափ եւ բիրտ ուժ կիրառելով՝ բերման ենթարկել ցուցարարներին: Ցուցարարները վանկարկում էին՝ «Նիկոլ դավաճան», «ամոթ»: Ոստիկանների քաշքշուքի ժամանակ ցուցարարները ձեռքերը վեր էին պարզել:
Կարդացեք նաև
Ոստիկանները քաշքշելով եւ անհամաչափ ուժի կիրառմամբ, փորձում էին բերման ենթարկել նաեւ պատգամավոր Արամ Վարդեւանյանին: Արդեն ոստիկանական մեքենայի մոտ, սակայն, նրան բաց թողեցին:
Իրավիճակը նույն արագությամբ հանդարտվեց, ոստիկանները բացեցին ճանապարհը, երթը շարունակվեց մայթով:
Հիշեցնենք, այսօր վաղ առավոտից, քաղաքացիները կրկին կաթվածահար են արել մայրաքաղաքի մի շարք փողոցներ:
Նելլի ԳՐԻԳՈՐՅԱՆ
