«Մեր վզին որևէ մեկը՝ այդ թվում դու և Նիկոլը որևէ բան չեք կարող փաթաթել»,- Ֆրանսիայի հրապարակում հայտարարեց ՀՅԴ Հայաստանի Գերագույն մարմնի ներկայացուցիչ, ԱԺ փոխնախագահ Իշխան Սաղաթելյանը` անդրադառնալով ՀՀ առաջին նախագահ Լևոն Տեր-Պետրոսյանի հայտարարություններին։
Հիշեցնենք՝ Լևոն Տեր-Պետրոսյանն ասել էր՝ «ով էլ լինի Փաշինյանի փոխարեն՝ Ռոբերտ Քոչարյանը, Սերժ Սարգսյանը կամ թեկուզ՝ Իշխան Սաղաթելյանը, միևնույն է՝ նրանք հլու-հնազանդ ընդունելու են այն լուծումը, ինչը փաթաթվելու է Հայաստանի վզին»։ Իշխան Սաղաթելյանը վստահեցրեց՝ «էս ժողովրդի վզին հնարավոր չէ զիջում փաթաթել» ու, դիմելով Լևոն Տեր-Պետրոսյանին, հիշեցրեց․ «Հարգելի′ պարոն Լևոն Տեր-Պետրոսյան, դու այդ նույն խոսքերն ասում էիր նաև 1998-ին, ասում էիր, որ հնարավոր չէ, պետք է զիջել, ամբողջ աշխարհը մեր դեմ է, լավ չես ապրի, քանի դեռ Ղարաբաղը չես հանձնել։ Բայց կյանքը ցույց տվեց, որ երբ քո փոխարեն եղավ այլ իշխանություն, մենք 20 տարի չզիջեցինք, և ՀՀ-ն ու Արցախը զարգացան՝ չզիջելով։ Բայց երբ 2018-ին իշխանության եկան քո գաղափարախոսության կրողները և հոգեզավակները, որոնք կրկին այդ գիտակցության մեջ էին, որ պետք է տանք, ուրիշ ճար չկա, Արցախի 72 տոկոսը տվեցինք։ Ժամանակն է, որ սրանք հեռանան, որ կարողանանք փրկել»։
Լևոն Տեր-Պետրոսյանի մյուս պնդմանը՝ «եթե մեր մտավորականներն իրապես ցանկանում են ազգանպաստ գործ կատարել, թող ստիպեն Նիկոլ Փաշինյանին, Ռոբերտ Քոչարյանին և Սերժ Սարգսյանին նստել մեկ սեղանի շուրջ և ելք գտնել ներքաղաքական ճգնաժամից», Իշխան Սաղաթելյանն այսպես արձագանքեց․ «Պարոն Լևոն Տեր-Պետրոսյան, ազգակործան պատուհասի հետ, ինչպես դու էիր բնութագրում, մենք սեղան նստելու հարց չունենք։ Մենք իր հետ ունենք մեկ օրակարգ՝ խաղաղ, անցնցում, րոպե առաջ հեռացում։
Տաթև ՀԱՐՈՒԹՅՈՒՆՅԱՆ
