Այսօր քայլարշավի ժամանակ, մինչեւ իրեն բերման կենթարկեին, Աշոտյանն անդրադարձավ արտաքին քաղաքական խնդիրներին. «Նիկոլենք ինչպես տեսնում ենք, արտաքին քաղաքականության մեջ կոշիկ լիզելու հետ սեր ունեն: Որ մայրաքաղաք գնում են` այդ մայրաքաղաքի կոշիկները լիզում են, ուր գնում է, մեր շարժմանը անուն է կպցնում, պատկերացնո՞ւմ եք: Գնում է Բրյուսել, ասում է՝ այս շարժումը ռուսական է, Պուտինն է ասել ցուցարարներին, որ գան, Կրեմլն է զանգել իրենց, հետո էլ գնացել է Ռուսաստան, ասել է՝ այս շարժումը ամերիկյան է, ամերիկացիներն են բզբզում: Երեւի Լուկաշենկոյի գլուխն էլ է կերել, ըստ Լուկաշենկոյի, մեր շարժումն արեւմտամետ է»:
Նա վստահեցրեց, որ այս շարժումը ոչ Մոսկվայի, ոչ Բրյուսելի, ոչ Վաշինգտոնի, ոչ Պեկինի շարժումը չէ, բացառապես Երեւանինն է:
Աշոտյանն ասաց, որ երեկ աննախադեպ թվով քաղաքացիների էին բերման ենթարկել. «Ես ինֆորմացիա ունեմ, քանի որ վաղը Հայաստան է ժամանում Լիտվայի նախագահը, Նիկոլ Փաշինյանն այսօր փորձելու է լպստել իր երեկվա թքածը, ու մի քիչ ավելի դեմոկրատ երեւալու համար ավելի քիչ բռնություններ են որոշել կիրառել: Նիկոլն այսօր փորձելու է մի քիչ ավելի պուպուշ երեւալ, մի քիչ ավելի պակաս մարդասպան, սեփական ժողովրդի վրա ձեռք բարձրացնող բռնարար: Բայց բնական է, որ այն, ինչ կատարվել է այս տարիների ընթացքում, Նիկոլին չի ներվելու»:
Հռիփսիմե ՋԵԲԵՋՅԱՆ
