«Տիկին Ղահրամանյանն իր հարցը հնչեցրել է։ Ասեմ ավելին՝ նա հնչեցրել է նաև իր արձագանքը։ Քանի որ մենք գտնվում ենք հանձնաժողովում, որտեղ կա հստակ աշխատակարգ, որը ենթադրում է, որ ձևաչափը չի կարող անվերջ շարունակվել, և երկրորդ արձագանքի հնարավորություն չկա, հիշեցրի, որ սա օրենսդիր մարմին է, որտեղ իր իսկ կողմից քվեարկված աշխատակարգի վրայով ոտքերը մաքրել պետք չէ, ինչպես և հաճախ տեղի է ունենում Լիանա Մանուկյանի կողմից ղեկավարված նիստերում»,-լրագրողների հետ ճեպազրույցում անդրադառնալով իր և Մարիաննա Ղահրամանյանի վեճին, որն առաջացավ այն ժամանակ, երբ Սոնա Ղազարյանը թույլ չտվեց, որ Մարիաննա Ղահրամանյանն արձագանքի Արարատ Միրզոյանին, այսպես ասաց ՔՊ խմբակցության պատգամավոր Սոնա Ղազարյանը:
Հարցին՝ ինչպե՞ս կմեկնաբանեք «Եվրասիական տնտեսական միության մասին 2014 թվականի մայիսի 29-ի պայմանագրի գործողությունը Հայաստանի Հանրապետության նկատմամբ կասեցնելու հնարավոր հետևանքների մասին» զեկույցը, որտեղ նշվում է, թե ինչ հետևանքներ կարող է ունենալ ԵԱՏՄ-ից դուրս գալը ՀՀ-ի համար, Սոնա Ղազարյանն այսպես արձագանքեց․ «ԵԱՏՄ-ն հստակ սահմանում է, որ որևէ անդամ պետության չես կարող հեռացնել։ ՀՀ-ն կարծում է, որ իր դիվանագիտական բոլոր ուղիները չի սպառել ԵԱՏՄ-ն ամենայն բարձր մակարդակով աշխատացնելու համար։ ԵԱՏՄ-ում ՀՀ-ն ասելիք ու անելիք ունի, ակնկալում ենք ռուս գործընկերներից, որ կվերացվեն բոլոր այն սանկցիաները, որոնք կիրառվել են հայկական կողմի նկատմամբ»։
Հարցին՝ գազի գնի թանկացման դեպքում ՀՀ իշխանությունները դա զսպելու ի՞նչ մեխանիզմներ ունեն, Սոնա Ղազարյանը պատասխանեց․ «ՌԴ-ն իր բարեկամ հայ ժողովրդի նկատմամբ նման սանկցիաների կիրառմանը չի անցնի։ Մենք հետևում ենք ՌԴ-ի կողմից ՀՀ տնտեսվարողների նկատմամբ կիրառված սանկցիաների հոսքին, համարում ենք, որ դրանք անտեղին են։ Քանի որ ռուսաստանյան տարբեր պաշտոնյաներ հաճախ նշում են հոգատարությունը հայ բարեկամ ժողովրդի նկատմամբ, չենք կարծում, որ գազի գնի բարձրացման սանկցիաներ կկիրառվեն հայ ժողովրդի նկատմամբ»։
Սոնա Ղազարյանի կարծիքով՝ հայ ժողովուրդը պատեհ պահի որոշում կկայացնի, թե որ մաքսային միության անդամ է ուզում լինել․ «Իսկ դիվերսիֆիկացիան չի սահմանափակվում միայն դեպի Արևմուտք ապրանքների արտահանմամբ։ Հիշեցնեմ բոլոր այն գործողությունները, որոնք տեղի են ունենում նաև դեպի հարավային պետություններ՝ Արաբական էմիրություններ, ասիական երկրներ»։
Կարդացեք նաև
Սոնա Ղազարյանի ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
