Երեւան-Սեւան մայրուղում լարված իրավիճակ էր: Դիմադրության շարժման անդամները փակել էին Երեւան-Սեւան ճանապարհը: Անհնազանդության գործողությունների ժամանակ ոստիկանները փորձում էին ուժ կիրառել ու բացել ճանապարհը, քաղաքացիներից մեկն ընկավ: «Ախպեր, մի թափեք վրեն, մի՛ թափեք»,- խնդրում էին քաղաքացիները: Ոստիկանները քաշքշելով՝ բերման էին ենթարկում:
Ընդդիմության ներկայացուցիչները փակել էին նաեւ Լոռու մարզում Սպիտակ-Վանաձոր ճանապարհը: Բայց այստեղ կարծես համագործակցություն կար ոստիկանության հետ: Նրանք վանկարկում էին՝ «միություն, պայքար, Հայաստան»: Ցուցարարները հորդորում էին արժանապատվություն ունենալ ու ունենալ «առանց թուրքի Հայաստան. «Մեր պայքարն ուղղված է հանուն Հայաստանի ինքնիշխանության, հանուն Արցախի հայկականության, հանուն մեր բոլորի արժանապատիվ ապագայի: Հայաստանի իշխանությունները ձգտում են երկիրը տանել թուրքացման ու մեզ պետք չէ թուրքի շահը սպասարկող իշխանություն»:
Արցախի դրոշը մի քանի րոպե փակված ճանապարհին ծածանելուց ու ելույթ ունենալուց հետո ակտիվիստները սեղմեին ոստիկանների ձեռքն ու բացեցին ճանապարհը:
Դիմադրության շարժման անդամները ավտոերթեր են իրականացնում նաեւ Երեւանից դուրս այլ հատվածներում՝ Նոյեմբերյանում, Կոտայքի մարզում:
Կարդացեք նաև
Հռիփսիմե ՋԵԲԵՋՅԱՆ
