Վերջին օրերին ավելի հաճախ է հնչում հարցը, թե գործող իշխանությունը արցախյան հակամարտության կարգավորման պատմության մասին խոսելիս ինչո՞ւ է սկսում 1998 թվականից, երբ իրականում այդ հակամարտության կարգավորման գործընթացը սկսվում է 1994 թվականի հրադադարից:
ԱԺ «Հայաստան» խմբակցության պատգամավոր Աղվան Վարդանյանը այդ մասին Aravot.am-ին ասաց. «Եթե դուք նայեք այս իշխանության կազմը, կառուցվածքը, կտեսնեք տասնյակ ու տասնյակ մարդկանց, որոնք նախկիններից նախկին են ձեւակերպված, կամ այդ ամենանախկինների զավակներն են: Այսինքն, էն մարդկանց սերունդն են, որոնք մինչեւ 1998 թվականը իշխանության էին եւ իշխանությունից հեռացումը նրանց մեջ թույն ու վրեժխնդրություն է կուտակել մեկ մարդու հետեւողական քայլերի շնորհիվ: Այդ պատճառով նրանք մինչեւ 98 թվականը չեն հիշում, չեն քննադատում: Նրանք կամ նրանց ծնողները մինչեւ 98 թվականը իշխանություն էին եւ նրանց մեջ ներդրվել է այդ վրեժխնդրությունը, ատելությունը 1998-ից հետո եկողների հանդեպ: Իսկ 98 թվականին իշխանությունը փոխվել է հենց Արցախի հարցով, Արցախի գերկարեւորումով, Արցախի հարցով առաջին նախագահի վերաբերմունքով, հոդվածներով, հարցազրույցներով, դիրքորոշումով: Այնպես որ, սա ինչ-որ տեղ բնական է, ինչպես որ կարող ենք բնական համարել առաջին նախագահի վրեժխնդրությունը, ատելությունը դաշնակցության հանդեպ, որ գալիս է իր ծնողներից»:
Աշոտ ՀԱԿՈԲՅԱՆ
