Գործադիրն այսօր հավանություն տվեց ԲՀԿ առաջնորդ Գագիկ Ծառուկյանին պատկանող «Օնիրա Քլաբ» ընկերության փոխարեն 4.2 մլրդ դրամ պետական տուրքը վճարելու մասին նախագծին։
Բանն այն է, որ 2020 թվականին պարետի որոշմամբ ժամանակավորապես արգելվել էին տնտեսական գործունեության առանձին տեսակներ, այդ թվում՝ խաղատները։ Ծառուկյանին պատկանող «Շանգրի Լա» խաղատունը պարետի որոշմամբ չի աշխատել, պետական տուրքեր չի վճարել, իսկ ֆինանսների նախարարությունը երկրորդ անգամ նրան զրկել է լիցենզիայից։ Ընկերությունը դիմել է դատարան, գործը հասել է մինչեւ վճռաբեկ, ի վերջո վճիռը հօգուտ «Օնիրա Քլաբ»-ի է եղել։
Կառավարության այսօրվա նիստում Նիկոլ Փաշինյանն այս հարցի զեկուցման ժամանակ ասաց․ «Ըստ էության, խոսքը հաշվանցման մասին է, պարտավորությունները զրոյացվում են։ Այս ամենը ծագել է քովիդի հետ կապված որոշումների արդյունքում, եւ այն բանի արդյունքում, որ ընկերությունը չաշխատելով՝ պիտի տուրքեր վճարեր, ընկերությունն էլ չի համաձայնվել ձեւակերպման հետ։ Հետո դատական մարմինները մեծամասամբ համաձայնել են ընկերության հետ։ Բայց եթե մենք հիմա այս կետի վրա կանգնենք, նույն պրոցեսի մեջ ենք մտնելու, փակուղին շարունակվելու է։ Դատական ակտը մեզ վերադարձրել է այն վիճակին, որից սկսել է այս ամեն ինչը։ Սրա համար երկու տարբերակ կար, կամ պետք է այնպես անենք, որ պատմությունը նորից զրոյից կրկնվի, կամ զրոյացնենք։ Մենք ընտրել ենք երկրորդ տարբերակը։ Մենք հիմա այս որոշմամբ ստեղծում ենք հնարավորություն, որ ընկերությունը հոկտեմբերի մեկից մաքուր էջից սկսի»։
Մանրամասն՝ տեսանյութում
Կարդացեք նաև
Նելլի ԲԱԲԱՅԱՆ
