Լրահոս
Օրվա լրահոսը

Ի՞նչ հանգամանքներում է այրվածքներ ստացել ու մահացել զինծառայողը․ ի՞նչ են պատմում Ազատանում

Հուլիս 27,2022 12:50

Այրվածքներից մահացած ժամկետային զինծառայող Պալյան Պողոսյանի դին այս պահին Այրվածքաբանության ազգային կենտրոնից տեղափոխում են ծննդավայր՝ Շիրակի մարզի Ազատան գյուղ։ Ազատանի նախկին գյուղապետ, այժմ Ախուրյանի խոշորացված համայնքի ղեկավարի տեղակալ Վարդան Իկիլիկյանն Aravot.am-ի հետ զրույցում ասաց, որ ծնողներին առաջարկել են Պալյանին հուղարկավորել գյուղի զինվորական պանթեոնում, սակայն դեռ հարցը որոշված չէ, նրանք ընտանեկան գերեզմանոց ունեն։

«Գյուղի տաս զոհերը կարծես քիչ էին, հիմա էլ Պալյանը»,- սգում է Վարդան Իկիլիկյանը։

Թե ինչ հանգամանքներում է այրվել զինվորը, համագյուղացիները պատմեցին հետևյալը․ «Իհարկե, քննությունը վերջնական պատասխանը կտա, բայց ճշտել ենք, որ բլինդաժում անվտանգության կանոններն են խախտվել։ Բլինդաժը 1700 մետրի վրա է՝ ծովի մակերևույթից բարձր, Սիսիանի կողմերը միշտ ցուրտ, քամի է, ամբողջ տարին վառարանը միացնում են։

Այս սեզոնին, ինչքան հասկանում ենք, փայտ չկա, քարածուխով են տաքացնում։ Վառարանը վառած է եղել, մեջը ածուխ, ածուխը տրաքել է, քնապարկերը սկսել են այրվել, քնապարկերն էլ սինթետիկ են, բոցը հենց կպավ՝ շատ դժվար կլինի հանգցնելը, շատ արագ են այրվում։ Իրենք ուզել են մարել կրակը ու այդ ընթացքում բոցը տվել է Պալյանի դեմքին, հալված սինթետիկ հատվածը լցվել է վրան, ցելոֆանատիպ բան է, միանգամից բռնկվում է։ 4 երեխա են եղել, 4-ն էլ այրվածքներ ստացել են, սակայն ամենածանրը Պալյանի վիճակն է եղել»։

Պալյանի ընտանիքի մտերիմներից մեկն էլ ասաց, որ տղան զորացրվելու էր հունվարին։

«Տան միակ տղան էր, մի տղա, մի աղջիկ են։ Շատ լավ զինվոր էր, շատ լավ համբավ ուներ, բա ինչ ծնողների երեխա է, խելոք, աշխատասեր, ստեղծող մարդիկ են, միշտ գյուղում են աշխատել, երբեք Ռուսաստան չեն գնացել, չեն բացակայել գյուղից։ Պապն անասնապահությամբ է զբաղվում, ինքն էլ յուրահատուկ սովորող, տնտեսագիտական համալսարանում էր սովորում, դասախոսներն ասում են՝ էնքան կազմակերպված տղա է»,-ասացին նրա ընտանիքի մտերիմները։

Հայաստանի պետական տնտեսագիտական համալսարանի Գյումրու մասնաճյուղը ցավակցություն է հայտնել․ «Խորը վշտով տեղեկացնում ենք, որ ս\թ հուլիսի 26-ին ջերմային 2-րդ աստիճանի այրվածքի պատճառով մահացել է ՀՊՏՀ Գյումրու մասնաճյուղի «Ընդհանուր տնտեսագիտության» ֆակուլտետի «Կառավարում» մասնագիտության առաջին կուրսի ուսանող, պարտադիր ժամկետային զինծառայող, շարքային Պալյան Ջիվանի Պողոսյանը:

ՀՊՏՀ ԳՄ ողջ անձնակազմը և ուսանողները իրենց խորին ցավակցությունն են հայտնում ուսանողի հարազատներին: Շնորհակալ ենք քեզ հայրենիքին ծառայության համար եղբայր, հավերժ փառք և խոնարհում»

Պաշտպանության նախարարության տարածած հաղորդագրության համաձայն՝ «Հուլիսի 26-ին, չնայած բժիշկների գործադրած բոլոր ջանքերին, մահացել է հուլիսի 17-ին Զանգեզուրի կայազորային հոսպիտալ, այնուհետև Այրվածքաբանության ազգային կենտրոն տեղափոխված պարտադիր ժամկետային զինծառայող, շարքային Պալյան Ջիվանի Պողոսյանը:

ՀՀ պաշտպանության նախարարությունը կիսում է կորստյան ծանր վիշտը և զորակցություն հայտնում Պալյան Պողոսյանի ընտանիքի անդամներին, հարազատներին և ծառայակիցներին»:

 

Նունե ԱՐԵՎՇԱՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2022
Երկ Երե Չոր Հնգ Ուրբ Շաբ Կիր
« Հուն   Օգո »
 123
45678910
11121314151617
18192021222324
25262728293031