Գյումրու Շիրազի փողոցում գտնվող հյուրանոցառեստորանային համալիրներից մեկի գործադիր տնօրեն Վարդան Սրտաշյանն Aravot.am-ի հետ զրույցում ասաց, որ զբոսաշրջային քաղաք դարձած Գյումրիում աշխատուժի մեծ պահանջարկ կա։
«Ծայրահեղ ծանր է աշխատուժի խնդիրը, սպասարկման ոլորտում բարձորակ աշխատող գտնելը շատ բարդ է։ Երևի թե Գյումրիում այսօր ավելի հեշտ է գտնել ազատ տիեզերագնաց, քան ազատ մատուցող։ Առավել ևս, երբ Գյումրիից մատուցողներին «գողանում են» Երևանն ու մյուս մարզերը, որովհետև այնտեղ օրական աշխատավարձը տատանվում է 20-25 հազար դրամի սահմաններում, իսկ Գյումրիում մատուցողի օրական աշխատավարձը 10 հազար դրամ է։
Պիկ ամիսներին Գյումրիի աշխատուժը գնում է Երևան աշխատելու, սեզոնի ավարտից հետո գալիս են Գյումրի ու այդ ժամանակ աշխատուժի ավելցուկ է ստեղծվում։
Այնպես որ բավական խնդիրներ կան՝ սպասարկման ոլորտի աշխատակազմի հետ կապված, քիչ կառույցներ կան, որոնք պատրաստում են այդ մասնագետներին։
Կարդացեք նաև
Ի պատիվ քույր Արուսյակի և նրա հիմնած «Տիրամայր Հայաստանի» կրթօջախի, այնտեղ լավ կադրեր են պատրաստում, քոլեջներ կան, որոնք ևս աշխատում են այդ ուղղությամբ, սերվիսի բաժիններ ունեն, բայց ծավալներն այնքան քիչ են, որ դեռ շուկայի վրա լուրջ ազդեցություն չեն թողնում։
Կարելի է բոլոր կրթական հաստատությունների ներուժն օգտագործելով՝ ավելացնել կադրերի թիվը ու խնդիրը լուծել։ Այսինքն՝ շատ կարևոր է այս պահից սկսած մասնագետներ պատրաստելը, որպեսզի զբոսաշրջության զարգացմանը զուգընթաց, ունենաք զբոսաշրջային մասնագետներ ու աշխատակազմ»,-ասաց Վարդան Սրտաշյանը։
Վարդան Սրտաշյան
Մեր զրուցակիցը նշում է, որ բարդ իրավիճակ է ստեղծվել նաև հավաքարարներ գտնելու առումով։
«Այս ոլորտի աշխատակիցների աշխատավարձը միջինը բարձրացել է 20-30 տոկոսով։ Պետությունը, ինչպես միշտ, համակարգային միջամտություններ չի ցուցաբերում, ամեն ինչ մնացել է էնտուզիաստների, անհատ մարդկանց հույսին, պետք է իրավիճակում բեկում մտցնել, բայց ինչպես՝ դեռ պարզ չէ»,-ասում է մեր զրուցակիցը։
Նունե ԱՐԵՎՇԱՏՅԱՆ
Գյումրիի լուսանկարը՝ Տիգրան Գասաբյանի
