Ազատամարտիկ Արշակ Զաքարյանը, որ նոր է վերադարձել Աղավնոյից, «Հայելի» ակումբում խոսել է այնտեղ տիրող մթնոլորտի, բնակչության ապրումների մասին, ինչպես նաեւ անդրադարձել է «Սուրմալու» առեւտրի կենտրոնում տեղի ունեցած ողբերգությանը:
Նրա խոսքով՝ այսօրվա իշխանությունները հանրության ուշադրությունը գլխավոր թեմաներից շեղելու տեխնոլոգիաները շատ լավ են անցել, եւ ինքը համոզված է, որ դրա համար ոչ մի բանի առջեւ կանգ չեն առնի: «Իսկ մարդիկ, ովքեր համակարգի մեջ չեն, անկախ են, նրանց պետք է չեզոքացնեն, փչացնեն: Հենց երկու օր առաջ Աղավնոյում, Ֆաթուլլաեւին այնտեղ բերելով, Անդրանիկ Չաուշյանի նման տղերքին արժեզրկելը տեխնոլոգիա է: Հիմա բոլորը խոսում են էդ մասին, բայց որ հոսանքը, ջուրը, անտենաները հենց երեկ անջատել են, մարդկանց՝ երեխաներին, կանանց, ծերերին, այնտեղ ապրելու, առանց ջրի այնտեղի տապին դիմանալու հնարավորություն չեն տալիս, ոչ ոք չի խոսում, չէ՞: Ոչ ոք չի խոսում 78 տարեկան տատիկի մասին, որը շվարած նստած է ու չգիտի ուր գնա, ինչ անի, ոնց գնա, ում դիմի: Ու երբ մոտենում՝ հարցնում ենք, թե՝ տատիկ ջան, ո՞նց օգնենք քեզ, ոչինչ չի խոսում: Ա՛յ, սա է շեղող տեխնոլոգիան, որպեսզի ոչ մեկն այդ մասին չի խոսի»,- ասում է նա:
Արշակ Զաքարյանը նաեւ նկատում է. «Մինչեւ օգոստոսի 25-ն էին խոսե՞լ, այդ խանումյան-մանումյաններն ասե՞լ էին, որ 25-ին դուրս են գալու: Ռուսն ասե՞լ է, որ մի սանտիմետր չեն տեղաշարժվի, մինչեւ այդ ճանապարհը պատրաստ չլինի: Հայերն ասե՞լ են, որ այդ ճանապարհն առնվազն մինչեւ մայիս պատրաստ չի լինելու: Այս ամենից շեղելու համար պետք է մարդկանց, որոնք համակարգում չեն, վարկաբեկեն, սեւացնեն: Ես այդ ամենով անցել եմ Քարվաճառում: Սա ցեղասպանություն է, իսկ ցեղասպանությանը նպաստողները ներսից են»,-ասաց Արշակ Զաքարյանը:
Նա նշեց, որ «Սուրմալուի» իրադարձությունների ժամանակ ինքն եղել է Աղավնոյում եւ միայն երեկ է վերադարձել: «Շատ ցավալի եւ ահավոր է: Ես սովորել եմ պոլիտեխնիկական ինստիտուտի լեռնամետալուրգիականում, բայց պատերազմն սկսվեց ու չեմ ավարտել: Սակայն երրորդ կուրսում մենք սովորում էինք պայթեցնող ինժեներներ մասնագիտությունը: Էն, որ ինքն ասում է՝ ծուխ, կրակ, հետո ինչ-որ պայթյուն ու շտամպը դնում է, նորմալ երկրում երկար ժամանակ կպահանջվեր, որպեսզի գտնեն, թե ինչից է տեղի ունեցել այդ ամենը: Տեսեք, սովորական ավտովթարի դեպքում ինչքան ժամանակ է պահանջվում, որպեսզի պարզեն պատճառը: Ո՞նց կարելի է հայտարարություն անել, այն էլ այդ մակարդակից, թե բացառում ենք ահաբեկչությունը: Ինչի՞ են բացառում: Որովհետեւ իրենց պետք է, որ դա բացառեն, իրենց պետք է, որ դա չուսումնասիրվի»,-ասաց Արշակ Զաքարյանը:
Կարդացեք նաև
Աշոտ ՀԱԿՈԲՅԱՆ
