ՀՀԿ փոխնախագահ Արմեն Աշոտյանը, որը Հայաստանում չէ, այսօր հայրենիք վերադառնալու ճանապարհին ուղիղ եթերով անդրադարձել է 2018 թվականի, իր խոսքով ասած, դառը, բայց առողջարար ճշմարտությունների, որոնց նախորդ եթերում չէր հասցրել անդրադառնալ:
«Հայաստանում չեմ, բայց ուշք ու միտքս Հայաստանն է: Հայաստանի խնդիրներով եմ արտերկրում: Նախորդ ելույթիցս հետո բազմաթիվ արձագանքներ եղան: Շնորհակալ եմ շահագրգիռ, հատկապես, ազնիվ քննարկումների համար, թեպետ եղան նաեւ հիվանդագին, պատվիրված արձագանքներ:
Ինչի՞ է 2018 թվականն այդքան կարեւոր եւ արդիական: Կարեւորեցին 2018-ը: Եթե չես տիրապետում անցյալիդ, ապա ապագա չունես: Իսկ այսօրվա քաղաքական առկա խնդիրների մեջ շատերը փորձում են փոխել իրենց, երկրի անցյալը: Բայց երկրի մասին չեն մտածում: Բացառապես մտածում են գիտակցված կամ անգիտակցաբար գործած սեփական սխալները հետին թվով սրբագրել՝ փորձելով անբարոյականությունը ներկայացնել որպես սեր, կիրքը՝ հավատարմություն եւ այլն»:
Արմեն Աշոտյանը նշեց, որ ընդդիմության մեջ որոշակի որոնողական, տատանվող, երերուն վիճակ է: «Փնտրտուքի մեջ ենք, կաթսան եփվում է: Ոմանց համար մեծ է գայթակղությունը՝ գնալ եւ 2018-ի իրենց արածները զոռով մտցնել մեր գրպանը: Չի ստացվելու: Եվ դրան են ուղղված իմ եթերները: Բայց իմ եթերների իրական նպատակը մեր վրա շպրտվող ցեխը մեզանից մաքրելը չէ: Մենք սովոր ենք, որ չեղած տեղից շպրտված ցեխը չորանում՝ ընկնում է, ու մենք շարունակում ենք շիտակ, ուղիղ քայլել՝ անկախ նրանից, թե որքան են մեր վրա վայրահաչողները»,-ասաց ՀՀԿ փոխնախագահը եւ անցավ բուն ասելիքին:
Կարդացեք նաև
«Կան «սերժացավ» կպած մի խումբ մարդիկ, որոնք ասում են. 2014 թվականին Սերժը սահմանադրությունը փոխեց, որպեսզի երրորդ անգամ դառնա ղեկավար: Հիշեք այդ մարդկանց, նրանք շատ են քաղաքական դաշտում: Ու այդ նույն մարդիկ մեզ մեղադրում են նրանում, որ Սերժը բերեց Նիկոլին: Դարը փոխվել է: Հասկանում եմ: Հիմա մարդիկ իրենց խոսքերի համար պատասխանատու չեն. մոռանում են երեկվա ասածը, վաղը կմոռանան այսօրվա ասածը: Բայց համաձայնեք, որ առնվազն հոգեբույժի պացիենտ է այն մարդը, որը միաժամանակ Սերժին մեղադրում է վերարտադրվելու ցանկության եւ Նիկոլին բերելու պրոյեկտի մեջ: Դա անհամատեղելի է: Եթե ըստ ձեզ Սերժը ուզենար վերարտադրվել եւ փոխել էր սահմանադրությունը, ապա Նիկոլին չէր բերի, պարզապես, կվերարտադրվեր: Իսկ եթե ուզեր բերել Նիկոլին, դրա համար սահմանադրություն չէր փոխի: Հետեւաբար, որոշ քաղաքական շրջանակներ պետք է ընտրեն, թե որ կլինիկական դիագնոզի հետեւորդն են: Դրանք իրար չեն բռնում ինչպես կուսությունն ու մարմնավաճառությունը:
Հաջորդը: Քաղաքական շրջանակների մարդիկ կան, որ շարունակում են պնդել, որ մեկ է՝ Ղարաբաղի հարցը ծախված էր, եւ Սերժը բերեց Նիկոլին ու այդ հարցը գցեց նրա ջեբը: Սա քաղաքական անբարո մանիպուլյացիա է: Սերժը, Ռոբերտը. կարեւոր չէ, ասում են՝ նախկինները Ղարաբաղը վաղուց ծախել էին: Ընկերներ, Սերժը, Ռոբերտը՝ Արցախի հերոսները, Ղարաբաղի համար մարտեր տված, Արցախին կյանքը նվիրած, ընկերներ կորցրած մարդիկ չեն կարող այդ ձեւակերպման մեջ ընկնել: Եթե նախագահ Սարգսյանը ուզենար Արցախի հարցերից ձեռքերը լվալ, ապա 2014-ին ասել էր՝ չի հավակնելու: Հետեւաբար, լրիվ կարող էր մերժել կուսակցությանը եւ չառաջադրվել: Այսինքն, այդ մարդկանց ընկալմամբ, Ղարաբաղը ում ջեբն ուզում է, թող ընկնի: Եթե կարող էք, ինձ բացատրեք լոգիկան՝ 2014-ի ասելու, որ ես չեմ հավակնելու, սուսիկ-փուսիկ, մաքուր հեռանալու եւ 2018-ին առաջադրվելու: Ոչ մի կերպ այդ թեզը չի դիմանում տարրական տրամաբանությանը եւ քննադատությանը»,-ասաց Արմեն Աշոտյանը:
Աշոտ ՀԱԿՈԲՅԱՆ
Պահ-պահ, հո վրա տալով չի? Շատ լավ էլ Սերժը Նիկոլին ԱԺ-ում դարձրեց վարչապետ։ Ընդդիմությունն այդքան ձայն չուներ, որ Նիկոլին վարչապետ ընտրեր, դրա համար էլ Սերժի հրահանգով ՀՀԿ-ականների մի մասը նույնպես միացան ընդդիմությանը և քվեարկեցին Նիկոլի օգտին։ Բոլորն էլ դա լավ հիշում են։ ՀՀԿ-ի պես ամուր կառույցը հենց այնպես չէր քվեարկի իրեն իշխանությունից զրկելու օգտին։ Ու եղավ այն, ինչ եղավ։ Այլ տիպի բացատրությունները Գյուլնազ տատի հեքիաթները կարող են լինել։