«ՀԱՊԿ-ի բոլոր իրավական փաստաթղթերն ուսումնասիրել եմ Ղազախստանի դեպքից հետո։ Հարց է առաջացնում՝ իշխանությունը ՀԱՊԿ պայմանագրի 4-րդ հոդվածո՞վ է դիմել»,-խորհրդարանում այսօր լրագրողների հետ զրույցում ասաց «Հայաստան» խմբակցության պատգամավոր Արամ Վարդեւանյանը՝ անդրադառնալով վարչապետ Նիկոլ Փաշինյանի այսօրվա հայտարարությանը, որ ՀՀ-ն դիմել է ՀԱՊԿ-ին։
Արամ Վարդեւանյանը շեշտեց․ «4-րդ հոդվածով դիմելու դեպքում արդեն իսկ պետք է տեսնեինք ՀԱՊԿ-ի գործողությունները, որոնք անհապաղ են։ Այդ հոդվածը հստակ ասում է, որ եթե լինում է զինված ագրեսիա ՀԱՊԿ անդամ երկրի հանդեպ, ապա դա դիտարկվում է որպես ամբողջ ՀԱՊԿ-ի դեմ ագրեսիա։ Թող հրապարակեն ՀԱՊԿ-ին ուղղված նամակը, տեսնենք, թե որ հոդվածով են դիմել։ Դա գաղտնի չէ, թող հրապարակեն։ Բայց եթե նորից պարզվի, որ երկրորդ հոդվածով են դիմել, խնդիր է առաջանում։ Նույնն էլ ՌԴ-ի հետ պայմանագրերի հարցում՝ ճի՞շտ են հարցը ներկայացրել ՌԴ-ին»։
Հիշեցնենք, որ Ադրբեջանը լայնածավալ ռազմական հարձակում է սկսել ՀՀ-ի դեմ՝ Գեղարքունիքի, Վայոց ձորի եւ Սյունիքի սահմանային հատվածներից։
Կարդացեք նաև
Արամ Վարդեւանյանը նշեց՝ իշխանությունը ժամանակին գլուխ էր գովում Ղազախստանի դեպքերի առիթով, որ առաջին անգամ կարողացել են ՀԱՊԿ-ին աշխատեցնել․ «Բա հիմա ինչո՞ւ չեն աշխատեցնում, ՀՀ սուվերեն տարածքի դեմ ագրեսիա է, պարտադիր պետք է Ղազախստան լինի՞»։
Լուիզա ՍՈՒՔԻԱՍՅԱՆ
