ԵԽԽՎ–ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան գրառումը
Ինչպես և կանխատեսելի էր, երեկ Արցախում ռուս խաղաղապահների միջոցառումը կրկին բուռն արձագանք է գտել ադրբեջանական քարոզչադաշտում:
Խաղաղապահների՝ «Որտեղ մենք ենք, այնտեղ խաղաղությունն է» պաստառին ի պատասխան՝ ադրբեջանցի հոդվածագիրը հրապարակել է՝ «որտեղ դուք, այնտեղ դժբախտություն. Բաքուն կարմիր գծեր է քաշում» վերնագրով հոդվածը:
Այստեղ մի երեք պարագրաֆ Իլհամ Ալիևին նվիրված գովքից հետո, կրկին հիշում են Ռուբեն Վարդանյանին: Առանձնակի սրտնեղել են տարբեր ռուսական լրատվամիջոցներին Վարդանյանի տված հարցազրույցներից, քանի որ դրանով Արցախի հարցը հնչեղություն է ստանում:
Կարդացեք նաև
Հատկապես նյարդայնացած են Վարդանյանի՝ չհանձնվելու, զինվորագրվելու և այլ կոչերից: Այդ ամենը համադրել են Նիկոլ Փաշինյանի այն հայտարարության հետ, որ խաղաղապահները պետք է երկար մնան ու որոշել, որ սա մեծ ռուսական դավադրություն է Ադրբեջանի դեմ: Հիշել են մեր «Միացում» շարժումը, նշել, որ խաղաղապահները 2025–ին պետք է դուրս գան ու վերջում սպառնացել բայրաքթարներով: Ահա այսպիսի «խաղաղասիրական» տրամադրություններ հարևան Ադրբեջանում:
