«Կամավորների ներգրավումը մարտական գործողություններին ծայրահեղ անհրաժեշտություն է եւ դա լավ օրից չէ, որ ներգրավում ենք: Ուղղակի անհրաժեշտ է, որ հնարավորինս շատ ուժեր, միջոցներ ներգրավենք մարտական գործողություններում: Բայց պետությունը մեխանիզմ է մտածել, որ կամավորները, որոնք անցնում են ծառայության, որոշակի վարձատրություն են ստանում: Թեեւ կամավորությունը եւ վարձատրությունը իրար հակասող սկզբունքներ են: Եթե մարդն ասում է՝ ես կամավոր եմ, ուզում եմ գնամ հայրենիքին ծառայեմ, ուրեմն չպետք է ակնկալի վարձատրություն: Բայց պետությունը գնացել է դրան ու վարձատրում է իր հնարավորությունների չափով»,- այսօր ԱԺ-ում լրագրողների հետ զրույցում ասաց ՔՊ պատգամավոր Արմեն Խաչատրյանը՝ անդրադառնալով կամավորների դժգոհություններին:
Նա նաեւ ասաց, որ Ջերմուկում ինժեներատեխնիկական աշխատանքները շարունակվում են, դրանից հետ երկաթբետոնյա պատնեշներ սարքելու աշխատանքներին են անցնելու: Հարցին՝ նոր սահմանագի՞ծ են կառուցում ադրբեջանցիների ներխուժման արդյունքում, այսինքն, չե՞ն վերադառնալու նրանք ելման դիրքեր՝ Արմեն Խաչատրյանը պատասխանեց, որ ինժեներատեխնիկական աշխատանքները պայմանավորված են մեր պաշտպանունակությունը բարձրացնելով. «Պետք է պատրաստ լինենք ամեն կերպ՝ ե՛ւ զենքով, ե՛ւ ինժեներատեխնիկական լուծումներով, սա կապ չունի սահմանագծման հետագա աշխատանքների հետ»:
Հարցին՝ մամուլում մերթընդմերթ հայտնվում է տեղեկություն հնդկական զենքի ձեռքբերման մասին, դա համապատասխանո՞ւմ է իրականությանը՝ նա հորդորեց դեռեւս ձեռք չբերված զենքի մասին այդքան չխոսել ու չլուսաբանել, թեեւ այդ տեղեկությունը դաշտ է նետվել հնդկական մամուլից. «Այո, զենքի գնման գործընթացները շարունակվում են, մի շարք երկրների հետ են բանակցություններ տարվում: Այն երկրները, որոնք պատրաստ են տալ այն, ինչի կարիքը մենք ունենք, հաստատ այդ ուղղությամբ միջոցառումներ են լինելու եւ իրականացվելու են»:
Կարդացեք նաև
Հարցին՝ «Պատիվ ունեմ» խմբակցության պատգամավոր Տիգրան Աբրահամյանն ասել է, որ մեզ այսօր ավելի շատ ռուսական զենք է պետք, համաձայն չե՞ք՝ նա պատասխանեց, որ զենքի լավագույն փորձաքննությունը պատերազմներն են ու մեր փորձագետները լավ գիտեն, թե մեզ ինչ զինատեսակ է պետք. «Այսօր Տիգրան Աբրահամյանը, որ այդպիսի կոչեր է անում, թող մի հատ հետեւի աշխարհում պատերազմական գործողություններին ու հասկանա, որ այսօր ԱԹՍ-ների լավագույն օրինակները ռուսականը չեն, այլ երկրներինն են, միայն իրանականը նկատի չունեմ: Վստահ եմ, որ ավելի լավ պրոդուկտներ կան աշխարհում, քան ռուսականն է»:
Հռիփսիմե ՋԵԲԵՋՅԱՆ
