Երևան քաղաքի առաջին ատյանի ընդհանուր իրավասության դատարանում դատավոր Մնացական Մարտիրոսյանի նախագահությամբ շարունակվում է Ավետիք Չալաբյանի գործով նիստը։
Hearings of the member of the ‘Unification’ movement, public-politician Avetik Chalabyan’s case took place at the Court of First Instance of General Jurisdiction of Kentron and Nork-Marash Administrative Districts
Հիշեցնենք, որ «ԱրԱր» հիմնադրամի համահիմնադիր, «Համախմբում» շարժման անդամ Ավետիք Չալաբյանը մեղադրվում է երկու կամ ավելի անձանց հավաքներին մասնակցելու նպատակով նյութապես շահագրգռելու համար:
Օրվա երկրորդ հարցաքննվող վկա Արմեն Սողոմոնյանը հայտնեց, որ մեղադրյալին չի ճանաչում։
Պաշտպանական կողմը վկա Արմեն Սողոմոնյանին հարցաքննելիս նկատեց, որ առկա են հակասություններ նրա կողմից նախաքննության ընթացքում և այսօր դատարանի դահլիճում տված ցուցմունքների միջև։ Պաշտպանները դատարանին միջնորդեցին հրապարակել վկայի’ նախաքննության ընթացքում տված ցուցմունքը։ Պաշտպանները նշեցին.«Վկայի տված ցուցմունքների միջև առկա է երկու էական հակասություն։ Առաջին, նախկինում վկան հայտնել է, որ Թոռնիկ Ալեյանի և Էմմա Սարգսյանի քաղաքական ղեկավարների հետ հանդիպումից հետո ինքն անձամբ հանդիպել է Թոռնիկ Ալեյանի հետ և տեղեկացել իրադարձությունների մասին։ Մինչդեռ, այսօր դատական նիստի ընթացքում վկան հայտնեց, որ միայն հայտնի ձայնագրությունը լսելուց հետո է տեղեկացել, թե ինչ է տեղի ունեցել։ Երկրորդը, նախկինում վկան հայտնել է, որ այդ հանդիպման ժամանակ Թոռնիկ Ալեյանից չի տեղեկացել, թե վերջինս ինչպես է պատասխանել առաջարկին։ Իսկ այսօր վկան ասում է, որ հստակ գիտեր, որ Թոռնիկ Ալեյանը մերժել էր այդ առաջարկը»։
Կարդացեք նաև
Ի պարզաբանումն իր ցուցմունքներում պաշտպանական կողմի մատնանշած հակասությունների’ վկա Արմեն Սողոմոնյանն ասաց. «Քաղաքական ղեկավարների հետ հանդիպումից հետո ես Թոռնիկին չեմ տեսել։ Նա հանդիպել է Զարեհ Գալստյանի հետ, չգիտեմ, թե էլ ով է ներկա եղել հանդիպմանը։ Ես նրա հետ հանդիպել եմ միայն ձայնագրությունը լսելուց հետո։ Նախկինում տվածս ցուցմունքն առաջին դեմքով եմ գրել, որովհետև պարտադիր չի ես անձամբ հանդիպեմ, որ հասկանամ՝ ինչ է եղել, ինձ պատմել են, ես էլ իմացել եմ։ Ես Զարեհի հետ եմ հանդիպել, նա է ինձ պատմել։ Այսքան ժամանակ էլ չեք հարցրել, արդյոք անձամբ Թոռնիկից եմ իմացել, թե պատմել են»։
Վկան մանրամասներ չհայտնեց իր և Զարեհ Գալստյանի հանդիպման մասին’ պատճառաբանելով, որ արդեն հինգ ամիս անցել է, չի հիշում։ Այնուամենայնիվ, նա հաստատեց, որ այժմ ասում է ճիշտը’ անկախ նրանից, թե ինչն ինչպես է իր ձևակերպել իր հինգ ամիս առաջվա ցուցմունքում։
Նելլի ԳՐԻԳՈՐՅԱՆ
