Ռուսաստանի արտգործնախարար Սերգեյ Լավրովը հայտարարել է, որ Ադրբեջանը պատրաստ է երաշխիքներ տրամադրել Արցախի հայերի իրավունքների համար:
Նա, մասնավորապես, նշել է, որ Հայաստանը բանակցություններում վերջին շրջանում արդեն ավելի շատ խոսում է ոչ թե կարգավիճակի, այլ Ղարաբաղի հայերի իրավունքների մասին: «Իսկ դրան ադրբեջանական կողմը պատրաստ է: Նրանք պատրաստ են տրամադրել երաշխիքներ այն իրավունքների համար, որոնք ունեն Ադրբեջանի մյուս քաղաքացիները»,- ասել է նա:
Լավրովը նաև ասել է, որ Պրահայում փաստացի Լեռնային Ղարաբաղը ճանաչվել է Ադրբեջանի մաս:
«Գնացել են Պրահա Եվրոպական քաղաքական համայնքի ֆորումին և այնտեղ ստորագրել են փաստաթուղթ այն մասին, որ սահմանազատումն ու խաղաղության պայմանագիրը պետք է հիմնվեն և համապատասխանեն ՄԱԿ-ի կանոնադրությանը և 1991թ. դեկտեմբերի Ալմաթիի հռչակագրին: Իսկ այդ հռչակագիրն ասում է, որ խորհրդային հանրապետությունները ձևավորում են ԱՊՀ և վերահաստատում սահմանների անխախտելիությունն այն սահմաններում, որոնք եղել են Խորհրդային Միության միութենական հանրապետությունների միջև: Այլ կերպ ասած, այդ ժամանակ Լեռնային Ղարաբաղի Ինքնավար Մարզը միանշանակորեն Խորհրդային Ադրբեջանի մաս էր: Եվ երբ դա հավանության է արժանացել և՛ Ադրբեջանի, և՛ Հայաստանի, և՛ Ֆրանսիայի և պարոն Միշելի կողմից մի փաստաթղթի շրջանակում, որ մենք ճանաչում ենք Ալմաթիի հռչակագիրն առանց վերապահումների, դա, իհարկե, հեշտացնում է աշխատանքը, քանի որ լուծում է այն հարցը, թե ինչպես մոտենալ Լեռնային Ղարաբաղի կարգավիճակի հարցին»,- ասել է Լավրովը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
