Պատերազմից հետո Ադրբեջանի վերահսկողության տակ են հայտնվել փոքր ՀԷԿ-եր, որոնց հայ սեփականատերերը միջազգային արբիտրաժային վարույթ են սկսել Ադրբեջանի դեմ՝ իրենց սեփականությունը յուրացնելու բողոքով:
Փոքր ՀԷԿ-երի 19 հայ սեփականատերերի շահերը ներկայացնում է իրավաբանական բավականին լուրջ թիմ, այդ թվում՝ արդարադատության նախկին նախարար Դավիթ Հարությունյանի փաստաբանական գրասենյակն ու անձամբ նախկին նախարարը:
Aravot.am-ի հետ զրույցում Դավիթ Հարությունյանը հարցին՝ ո՞ր փուլում է գործի ընթացքը ու ի՞նչ ակնկալիքներ ունի՝ պատասխանեց. «Անձամբ զբաղվում եմ ես, ակնկալիքը՝ իրավական պրոցես է: Շատ բան չեմ կարող մեկնաբանել, որովհետեւ յուրաքանչյուր բառը կարող է օգտագործվել ընդդեմ»:
Հայցը վերաբերում է Մարտակերտի, Լաչինի եւ Քելբաջարի շրջաններում գտնվող փոքր ՀԷԿ-երին: 2020-ի ռազմական գործողությունների արդյունքում Ադրբեջանն իր վերահսկողության տակ անցած այդ տարածքներում գործող փոքր ՀԷԿ-երն ընդգրկել է AzEnergy պետական ընկերության կազմում։ Հայ սեփականատերերի հայցի համաձայն, դրանով Ադրբեջանը խախտել է Եվրոպական էներգետիկ խարտիայի բազմաթիվ դրույթներ։
Կարդացեք նաև
Դավիթ Հարությունյանն ասաց. «Մինչեւ վարույթ ընդունվելը կա նախնական փուլ: Մենք դիմում ենք այն կողմին, ներկայացնում ենք մեր պահանջներն ինչպիսին են եւ իրենք պետք է դիրքորոշում արտահայտեն: Իրենք 3 ամիս ունեն արձագանքելու համար, հետո կսկսվի պրոցեսը: Իսկ պրոցեսները տեւում են երկար, մոտավորապես 4 տարի միջինը»:
Հայցը բավարարվելու դեպքում Ադրբեջանը փոխհատուցում կվճարի մի քանի հարյուր միլիոն դոլար:
Հռիփսիմե ՋԵԲԵՋՅԱՆ
