Թիվ 124 մանկապարտեզ հաճախած երեխայի նկատմամբ ենթադրյալ բռնություններ կատարելու աղմկահարույց դեպքով նախաքննությունը արդեն մեկ տարուց ավելի է՝ շարունակվում է, բայց տուժող կողմի ներկայացուցչի համար տեսանելի որեւէ բան չի արվում:
«Գործով քննիչ է փոխվել, ըստ էության որեւէ քննչական գործողություն չի կատարվել: Մեզ չեն ծանոթացնում քննչական գործողությունների արձանագրություններին, տիրապետում ենք շատ քիչ տվյալների, նախաքննությունն արդեն մի քանի ամիս է՝ տեղում է: Նույնիսկ դիմել եմ դատախազին՝ պարզելու համար, վերջինս պատասխանել է, որ կատարվում են վարույթային գործողություններ, բայց թե ինչ գործողություններ, դեռեւս պարզ չէ: Մեզ համար դեռևս տեսանելի ոչինչ տեղի չի ունենում»,- Aravot.am-ի հետ զրույցում ասաց տուժող կողմի ներկայացուցիչ Ինեսա Պետրոսյանը:
Փաստաբանը նշեց, որ նախաձեռնված քրեական վարույթի շրջանակում ձեռք է բերվել փորձաքննության եզրակացություն, որով հաստատվել է, որ երեխայի պատմածները չեն կարող երեւակայության արդյունք լինել: Մեր հարցին՝ արդյոք հաստատված համարվում է, որ երեխայի պատմածները հենց մանկապարտեզում են եղել, այլ ոչ թե այլ վայրում, փաստաբանը պատասխանեց. «Երեխան պատմել է կոնկրետ դեպքերն ու իրադարձությունները որտեղ են զարգացել»: Ինեսա Պետրոսյանը բացառում է, որ երեխայի պատմածներն այլ վայրում տեղի ունեցած լինեն:
Մեղադրյալների պաշտպան Ենոք Ազարյանն էլ հեռախոսազանգերին սկսել է չպատասխանել:
Կարդացեք նաև
Արփինե ՍԻՄՈՆՅԱՆ
