Բուլղարիայի մայրաքաղաքում ավարտվել է բռնցքամարտի Ստրանջայի 74-րդ ավանդական միջազգային մրցաշարը: Հայաստանը մրցավայր մեկնել էր 12 բռնցքամարտիկով, որոնցից չորսը տուն են վերադառնում մեդալներով:
Եզրափակչում 80 կգ քաշային Համբարձում Հակոբյանը հավասար պայքարում զիջել է աշխարհի գործող չեմպիոն ամերիկացի Ռոբի Գոնսալեսին ու արժանացել արծաթե մեդալի: Հետաքրքրական է, որ մարտի ավարտից հետո հաղթողի անունը հայտարարելուց առաջ ամերիկացին, ի նշան շնորհակալության եւ հարգանքի, հատուկ սեղմեց հայ մրցակցի ձեռքը:
Ինչ վերաբերում է գերծանր քաշային Դավիթ Չալոյանին, Հայաստանի բռնցքամարտի ֆեդերացիայի մամուլի ծառայությունը տեղեկացնում է, որ գյումրեցին վնասվածքի պատճառով չկարողացավ ներկայանալ վճռորոշ մենամարտին եւ հաղթանակը շնորհվեց Տոկիոյի օլիմպիական խաղերի չեմպիոն Բակհոդիր Ջալոլովին:
Ավելի վաղ Արթուր Բազեյանը՝ 57 կգ քաշային կարգ եւ Գուրգեն Մադոյանը՝ 67 կգ, նվաճել էին մրցաշարի բրոնզե մեդալներ:
Կարդացեք նաև
Մրցաշարի ավարտից հետո Հայաստանի ազգային հավաքականի գլխավոր մարզիչ Կարեն Աղամալյանը իր ՖԲ էջում գրել է, որ այս տարի Ստրանջայի մրցաշարն, ըստ էության, աշխարհի փոքր առաջնություն էր, որ ընդհանուր առմամբ գոհ է տղաներից, որոնք երկու ամիս հետո մեկնարկող աշխարհի առաջնությանը նախապատրաստվելու այս փուլում անհրաժեշտ թվով մենամարտեր անցկացրին: Նա նաեւ նշել է, որ մասնակից 38 երկրների մեջ նվաճած մեդալների քանակով Հայաստանը արժանիորեն դարձել է երրորդը եւ որ ամբողջ մրցաշարի ընթացքում տղաներին աջակցել է ՀԲՖ նախագահը:
Աշոտ ՀԱԿՈԲՅԱՆ
