«102 օր է` Արցախի ժողովուրդը գերության մեջ է: Փակ է Արցախը ՀՀ-ի կապող միակ ճանապարհը և արտաքին աշխարհի հետ հաղորդակցման միակ ճանապարհը: Դա լոկ ճանապարհ չէ, այն ունի բազմակի նշանակություն, քանզի դրանից են ծնվում մարդու կյանքն ու անվտանգությունը, նվազագույն կենսաապահովման պայմանները և ազատության տարրական զգացումը»,- Արցախի շրջափակման 100-րդ օրվա կապակցությամբ հայկական ու միջազգային լրատվամիջոցների համար կազմակերպված ասուլիսի ժամանակ հայտարարեց ԱՀ պետնախարար Գուրգեն Ներսիսյանը:
Նա նշեց՝ այժմ խոսում է պարզագույն իրավունքների մասին, որոնք ունեն դարերի ծագում ու պատմություն և փաստեց. «Բայց մենք դրա համար տառապանք ենք կրում: Սա տեղի է ունենում 21-րդ դարում, երբ աշխարհում փորձ է արվում ազատականացնել սահմանները, երբ բոլոր պետությունները ձեռնարկում են միջոցներ իրենց քաղաքացիների համար աշխարհը տեսնելու և հարաբերվելու համար, և մարդու կյանքն ու անվտանգությունը պաշտպանելու համար հասանելի են դարձնում բոլոր բուժհաստատությունները՝ անկախ դրանց գտնվելու վայրից: Սա, իհարկե, նորմալ է, քանի որ մարդն աշխարհի համար բարձրագույն արժեք է, մարդը, բայց թվում է, թե ոչ Արցախում ապրող մարդը: Հանկարծ տպավորություն չստեղծվի՝ ինչ-որ բան ենք պահանջում, մենք առհասարակ այս իրողությունների հետ ապրում ենք տևական տարիներ, և երբևէ աշխարհից չենք աղերսել, չենք պահանջել ավելին: Ընդամենը փորձել ենք բավարարվել մեր տարրական մարդկային իրավունքներով, հույսով՝ մի օր աշխարհի համար Արցախում ապրող մարդը բացառություն չի լինի»:
Ըստ ԱՀ պետնախարարի՝ ճանապարհի փակումը Ադրբեջանի կողմից իրականացվող համակարգային գործողությունների մի տարրն է: Նա պարզաբանեց. «Իրականում Ադրբեջանը հետապնդում է մի քանի նպատակ՝ տնտեսական շրջափակում և Արցախի կենսագործունեության բնական պայմանների վերացում: Դա տեղի է ունենում էներգամատակարարման և գազամատակարարման պարբերաբար դադարեցումների խափանումների, ներքին ու արտաքին կապի, հեռավար կապի խոչընդոտներով, Արցախ ներկրվող ապրանքների մատակարարման դադարեցմամբ, գյուղատնտեսական աշխատանքների խոչընդոտմամբ: Երկրորդր՝ ֆիզիկական և հոգեբանական ուժի կիրառումն է և ուժի կիրառման սպառնալիքի ցուցադրումը: Երրորդը՝ արցախցիներին հոգեբանական ահաբեկման ենթարկելն է, վախի ու սարսափի մթնոլորտ ստեղծելը, անիշխանության և անորոշության վիճակ ստեղծելը»:
Գուրգեն Ներսիսյանն ահազանգեց՝ Արցախը Ադրբեջանին պետք է առանց հայերի՝ առավելագույնը քիչ թվով հայերով: Դրա համար փորձում են ձեռնարկել բոլոր միջոցները Արցախը հայաթափելու նպատակով:
Կարդացեք նաև
ԱՀ պետնախարարն ասաց, որ վնաս է կրել գյուղատնտեսությունը, կրթական, ֆինանսական համակարգը և այլ ոլորտներ. «Միայն տեղական հարկային եկամուտները կրճատվել են մոտ 70 տոկոսով, առկա է գործազրկության մեծ ցուցանիշ, վնաս է հասցվել ՀՆԱ-ին: Միայն Արցախում գործող տնտեսվարող սուբյեկտների 20 տոկոսը դադարեցրել է գործունեությունը, մյուսները մի կերպ պետական աջակցությամբ փորձում են իրենց գործունեությունը պահպանել»:
Դիմելով միջազգային հանրությանը՝ Գուրգեն Ներսիսյանն ասաց. «Ձեր աչքի առաջ գրեթե շուրջօրյա տեղի են ունենում մարդու պարզագույն իրավունքների ոտնահարման բացահայտ փորձեր, բայց միջազգային հանրությունը շարունակում է լուռ մնալ: Դրա համար էլ Ադրբեջանն ավելի է ուժեղացնում իր ագրեսիվ քաղաքականությունը: Երեք ամիս շարունակ ոչ միայն առարկայացված չի քննադատությունը միջազգային հանրության կողմից, այլև ցուցաբերված անգործությունից և պասիվությունից օգտվելով՝ նույնիսկ ավելի սաստկացած իր գործողությունները կատարելով՝ Ադրբեջանը սպանեց ԱՀ ոստիկանության ծառայողներին, ու այդ ամենից հետո մնաց անատիժ»:
Տաթև ՀԱՐՈՒԹՅՈՒՆՅԱՆ
