«Ակնհայտ է, որ Հայաստանը շատ ծանր գործընթացների մեջ է, որովհետեւ Բրյուսելում եւ Բրյուսելից առաջ հնչած հայտարարությունները որպես ի շարունակություն դրա՝ այսօր հնչող հայտարարությունները ցույց են տալիս, որ Հայաստանի իշխանությունը մտել է Արցախի հանձնման գործընթաց, եւ Հայաստանի Հանրապետության ինքնիշխան տարածքների՝ Ադրբեջանին փոխանցման գործընթաց»,-այս մասին այսօր կառավարության շենքի դիմաց, որտեղ բողոքի ցույց են անում զոհված զինծառայողների հարազատները, ասաց ԱԺ ընդդիմադիր պատգամավոր Տիգրան Աբրահամյանն՝ անդրադառնալով Նիկոլ Փաշինյանի այսօրվա ասուլիսին։
Աբրահամյանի խոսքով՝ սա Ադրբեջանի կողմից 2021-2022 թվականների ընթացքում Հայաստանի բռնազավթված տարածքների՝ Ջերմուկ, Վարդենիս, Կապանի եւ Տեղ գյուղի ուղղությունների որոշակի լեգիտիմացման գործընթացն է․ «Այսօր իշխանությունը նպատակ ունի մարսեցնել այս գործընթացը՝ հասարակության համար ներկայացնելով այնպիսի փաթեթավորմամբ, որպեսզի տպավորություն ստեղծվի, թե այլ տարբերակ իբր չի եղել եւ հանձնման գործընթացը ներկայացվի որպես օրինաչափություն։ Այլ բացատրություն չկա»։
Պատգամավորը նկատեց՝ բրյուսելյան հանդիպումը բովանդակային առումով նորություն չէր պարունակում, սակայն երկրների տարածքային ամբողջականության ճանաչումը նշված էր քառակուսի մետրերով․ «Սա պետք է հասարակության բոլոր խմբերի համար լինի վերջնական ազդակ, նաեւ այն մարդկանց համար, որոնք մինչ օրս կասկածում էին, թե տարածքներ չեն հանձնելու, որ Բրյուսելը դա պարզ ցույց տվեց»։
Կարդացեք նաև
Նելլի ԲԱԲԱՅԱՆ
