«Պարոն Ավինյանը 2018 թվականից մինչեւ 2022 թվականը եղել է ՀՀ փոխվարչապետ։ Սա նշանակում է, որ պարոն Ավինյանը շատ լավ տիրապետում է կառավարության աշխատանքը, մասնավորապես, նաեւ ֆինանսական ոլորտի հետ կապված»,- այս մասին այսօր լրագրողների հետ ճեպազրույցում ասաց Երեւանի քաղաքապետի ժամանակավոր պաշտոնակատար Լևոն Հովհաննիսյանը՝ անդրադառնալով հարցին, թե ինչո՞ւ է կառավարության նիստերին մասնակցում փոխքաղաքապետ Տիգրան Ավինյանը։
Նա հավելեց․ «Քանի որ պարոն Ավինյանն այդ աշխատանքը կարող է անել արդյունավետ եւ այդ աշխատանքն արել է արդյունավետ, մենք նպատակահարմար ենք գտնում, որ հենց պարոն Ավինյանը լինի կառավարության նիստերին»։
Հարցին, թե Տիգրան Ավինյանի ակտիվությունը քարոզարշավ չի համարվո՞ւմ, Լեւոն Հովհաննիսյանը պատասխանեց․ «Ես սա չեմ համարում քարոզարշավ, ես սա համարում եմ ընթացիկ աշխատանք։ Այդ տրամաբանությամբ ստացվում է, որ յուրաքանչյուր քաղաքական թիմ, որը տվյալ համայնքում ղեկավարում է, պետք է ընտրություններից մեկ տարի առաջ որեւէ գործ չանի։ Ես չեմ կարծում, որ քաղաքապետարանում միայն պարոն Ավինյանն է աշխատում։ Պարոն Ավինյանը շատ արդյունավետ է աշխատում, բոլորս էլ աշխատում ենք»։
Ռոզա ՀՈՎՀԱՆՆԻՍՅԱՆ