«Փաշինյանը փորձում էր անդրադառնալ ԼՂ միջանկյալ կարգավիճակի շուրջ փոփոխություններին եւ զարգացումներին։ Հիշեցնեմ, որ միջանկյալ կարգավիճակը ամրագրված էր կազանյան փաստաթղթով։ Այս փաստաթուղթը շարունակում է մնալ միակ աշխատանքային փաստաթուղթը, որն առկա է ԵԱՀԿ դեպոզիտարիայում։ Այսինքն, ցանկացած լուծում, որ այն ժամանակ բանակցվելու էր, այս կամ այն կերպ հիմնվում է Կազանի վրա, որի մասին Փաշինյանը բազմիցս ասել է, որ դա Հայաստանի համար խնդրի լուծման լավագույն տարբերակն էր»,- այս մասին այսօր հրավիրված ասուլիսում ասաց ԱԺ «Պատիվ ունեմ» խմբակցության ղեկավար Հայկ Մամիջանյանն՝ անդրադառնալով վարչապետ Նիկոլ Փաշինյանի՝ երեկ 44-օրյա պատերազմի հանգամանքներն ուսումնասիրող քննիչ հանձնաժողովի նիստում արած հայտարարություններին։
Պատգամավորի խոսքով՝ Փաշինյանը որերորդ անգամ խոսում է ՄԱԿ ԱԽ չորս բանաձեւերից․ «Ես հոգնել եմ կրկնել, որ դա եղել է, կա եւ կլինի ադրբեջանական հիմնական կեղծ կռվան։ ՄԱԿ-ի բանաձեւերը վերաբերելի են հրադադարի հաստատմանը։ Հրադադարի հաստատումից հետո դրանք գործընթացին բացարձակապես վերաբերելի չեն։ Հենց դա է պատճառը, որ բանակցային գործընթացում դրանք երբեք չեն եղել աշխատանքային փաստաթուղթ։ ՀՀ-ն այդ փաստաթղթերով ունի ընդամենը մեկ պարտավորություն՝ իր ազդեցությունն օգտագործել Ղարաբաղի իշխանությունների վրա՝ հրադադարի ռեժիմի պահպանման համար»։
Նելլի ԲԱԲԱՅԱՆ
