Լոռու մարզի Սպիտակ համայնքում դեռ 2 տարի առաջ մեկնարկած սոցիալական բնակարանաշինությունը, որը նախատեսված էր ավարտել այս տարի, չի ավարտվի: Aravot.am-ի տեղեկություններով՝ շինարարը դիմել է Սպիտակի համայնքապետարան ժամկետի երկարացման թույլտվություն ստանալու նպատակով: Շինաշխատանքների թույլտվության ժամկետը համայնքապետարանի կողմից երկարաձգվել է եւս 1 տարով:
Aravot.am-ի հետ զրույցում Սպիտակի քաղաքապետի տեղակալ Արտակ Մաթոսյանն ասաց՝ ծրագիրն իրականացվում է քաղաքաշինության կոմիտեի պատվերով, համայնքը որպես պատվիրատու հանդես չի գալիս: Համայնքապետը դժվարացավ ասել, թե ներկա դրությամբ որ փուլում է շինարարության ընթացքը. «Որոշակի աշխատանքներ կատարված են, առաջին հարկը կառուցված է, բայց թե դա աշխատանքի քանի տոկոսն է՝ չեմ կարող ասել, քանի որ նաեւ իրավասու չեմ»:
Ներկայացնելով ծրագիրը, Արտակ Փանոսյանն ասաց՝ սոցիալական բնակարանաշինություն է՝ պետական միջոցներով կառուցվող: Թե ովքեր են լինելու կառուցվող բնակարանների շահառուները՝ փոխքաղաքապետն ասաց. «Շահառուներին ընտրելու է պետությունը, կարծեմ սոցապ նախարարությունը»:
36 բնակարանների կառուցման շինարարությունը մեկնարկել էր 2021թ-ին, նախատեսվում էր շահագործման հանձնել 2023թ-ին: Փոխքաղաքապետն ասաց՝ համայնքից շինթույլտվության երկարաձգում են ուզել. «Պետք է այս տարի ավարտեին, հիմա առաջին հարկն է ավարտված, երկրորդից էլ մի փոքր հատված, դժվար թե ավարտեն այս տարի»:
Կարդացեք նաև
Թե ի վերջո ով է համայնքում 2 տարի ընթացող շինարարության պատվիրատուն՝ համայնքապետի տեղակալը այդպես էլ չկարողացավ հստակ ասել, շարունակ կրկնելով՝ կամ սոցապն է, քամ քաղաքաշինության կոմիտեն. «Պետական ծրագիր է, համայնքը ոչ ներդրում ունի, ոչ մասնաբաժին, ոչ էլ պայմանագրի կողմ է, հետեւաբար, կդժվարանամ հստակ որեւէ բան ասել»:
Ըստ նախագծի կառուցվող սոցիալական բնակարանների շահառուների մասին եւս, համայնքապետարանում հստակ ոչինչ չգիտեն. «Սոցիալապես անապահով խավի, կամ էլ…քանի որ դեռ որոշված չէ թե ովքեր են լինելու շահառուները, հստակ ցուցում չկա, կդժվարանամ ասել, թե ում համար են կառուցվում բնակարանները»,-ասաց համայնքապետի տեղակալը:
Թեմայի վերաբերյալ Aravot.am-ը դիմեց նաեւ քաղաքաշինության կոմիտե՝ պարզելու, թե ի վերջո՝ ինչ ծրագիր է իրականացվում, սոցիալապես որ խավի եւ երբ է նախատեսված վերջնաժամկետը: Առաջարկեցին դիմել գրավոր հարցմամբ: Հարցման պատասխանը ստանալուն պես այն կներկայացնենք:
Էդվարդ ԱՐԶՈՒՄԱՆՅԱՆ
