Ռուսաստանի ԱԳՆ-ն հաղորդագրություն է տարածել երեկ Մոսկվայում Ռուսաստանի, Հայաստանի և Ադրբեջանի արտգործնախարարներ Սերգեյ Լավրովի, Արարատ Միրզոյանի և Ջեյհուն Բայրամովի միջև երկկողմ և եռակողմ հանդիպումների վերաբերյալ:
Դրանում նշվում է, որ եռակողմ հանդիպմանը նախարարները կենտրոնացել են Լեռնային Ղարաբաղի շուրջ իրավիճակի ապաէսկալացման և հայ-ադրբեջանական հարաբերությունների կարգավորման գործընթացն առաջ մղելու համատեղ ջանքերի վերլուծության վրա՝ համաձայն Ռուսաստանի, Ադրբեջանի և Հայաստանի ղեկավարների՝ 2020թ. նոյեմբերի 9-ի, 2021թ. հունվարի 11-ի և նոյեմբերի 26-ի, և 2022թ. հոկտեմբերի 31-ի հայտարարությունների դրույթների:
Ռուսական կողմն ընդգծել է Լաչինի միջանցքի արագ ապաշրջափակման և Լեռնային Ղարաբաղի բնակչության բնականոն կյանքի վերականգնման անհրաժեշտությունը։
Արտաքին գործերի նախարարությունների ղեկավարները վերահաստատել են եռակողմ համաձայնագրերի բոլոր ուղղություններով աշխատանքի ակտիվացման կարևորությունը, ներառյալ՝ տրանսպորտային հաղորդակցությունների ապաշրջափակումը, Ադրբեջանի և Հայաստանի միջև սահմանազատումը, ինչպես նաև մտավորականների և փորձագետների գծով շփումները և խորհրդարանականների միջև երկխոսության մեկնարկը: Առանձնահատուկ ուշադրություն է դարձվել Բաքվի և Երևանի միջև խաղաղության պայմանագրի համաձայնեցման թեմային՝ շեշտը դնելով մնացած տարաձայնությունների հաղթահարման վրա։
Կարդացեք նաև
Լավրովի և Բայրամովի զրույցի ընթացքում քննարկվել են երկկողմ օրակարգի հիմնական հարցերը, ինչպես նաև միջազգային և տարածաշրջանային հարցեր։ Նախարարները քննարկել են Կասպից ծովում համագործակցության ընթացքը, և Հյուսիս-Հարավ միջազգային տրանսպորտային միջանցքի ծրագրի իրականացման շրջանակում կողմ են արտահայտվել 3+3 խորհրդատվական տարածաշրջանային հարթակի համագործակցության վերականգնմանը։
Լավրովի և Միրզոյանի հանդիպմանը վերլուծվել են ռուս-հայկական օրակարգի ամենաակտուալ թեմաները, այդ թվում՝ տնտեսական և հումանիտար ոլորտներում։ Պայմանավորվածություն է ձեռք բերվել շարունակել արդյունավետ փոխգործակցությունը ընդհանուր ինտեգրացիոն միավորումների՝ ԵԱՏՄ, ՀԱՊԿ և ԱՊՀ շրջանակներում։
Պատրաստեց Վիկտորյա ԱՆԴՐԵԱՍՅԱՆԸ
