Ռուսաստանը պատրաստ է մշտապես օգնել հայ-ադրբեջանական հարաբերությունների կարգավորման գործընթացին: Այս մասին հայտարարել է Ռուսաստանի արտգործնախարար Սերգեյ Լավրովը՝ Մոսկվայում հյուրընկալելով Հայաստանի և Ադրբեջանի իր գործընկերներ Արարատ Միրզոյանին և Ջեյհուն Բայրամովին:
«Այսօր կցանկանայի ձեզ առաջարկել մտքեր փոխանակել այն մասին, թե որտեղ է այժմ գտնվում Հայաստանի և Ադրբեջանի միջև խաղաղության պայմանագրի շուրջ բանակցությունների գործընթացը: Մենք պատրաստ ենք ամեն կերպ օգնել դրա համաձայնեցման գործում՝ օգտագործելով մեր փորձագիտական ներուժը և բարեկամական հարաբերությունները այստեղ ներկա մեր բարեկամների հետ»,- ասել է Լավրովը:
Նա նշել է, որ Մոսկվան հանդես է գալիս այն բանի օգտին, որ բոլոր եռակողմ պայմանավարվածությունները կյանքի կոչվեն: Լավրովի խոսքով՝ Ռուսաստանը խորապես շահագրգռված է Հարավային Կովկասում խաղաղությամբ և կայունությամբ:
«Մենք կողմերի համաձայնությամբ, որը, ինչպես ես հասկանում եմ, հաստատված է, կշարունակենք մեր ջանքերը՝ ուղղված հայ-ադրբեջանական սահմանին իրավիճակի կայունացմանը և մարդասիրական հարցերի լուծմանը, տնտեսական-տրանսպորտային կապերի ապաշրջափակմանը, քաղհասարակության, փորձագետների, քաղաքագետների և խորհրդարանականների մակարդակով մարդկանց միջև կապերի ամրապնդմաննը»,- ասել է Լավրովը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
