Aravot.am-ին են դիմել Արցախի Հանրապետության դիմորդներ, որոնք ընդունվել են ՀՀ բուհեր: Նրանք մասնավորապես հետաքրքրվում են, թե ինչպես են իրենց փաստաթղթերի բնօրինակները հանձնելու այն բուհերին, որտեղ ընդունվել են, քանի որ թշնամու կողմից շրջափակման պատճառով չեն կարող դուրս գալ հանրապետությունից:
ԿԳՄՍ նախարարությունից թեմայի վերաբերյալ հետեւյալը պարզաբանեցին. «Կարգի համաձայն, երբ արդյունքները հաստատվում են Հանրապետական ընդունող հանձնաժողովի կողմից, դիմորդները պարտավոր են իրենց փաստաթղթերի բնօրինակները ներկայացնել բուհին: Նրանց փաստաթղթերը ներբեռնված են dimord.am կայքում, բայց բնօրինակները պետք է ներկայացնեն իրենց ընդունված բուհերին:
Երբ արդյունքներն ամփոփվել են, ավտոմատ ծանուցում է գնացել բոլոր դիմորդներին, այդ թվում՝ Արցախի: Սակայն իրավիճակը հասկանալով, ինչպես անցյալ տարի է անհատական մոտեցում ցուցաբերվել, այս դեպքում կրկին նման մոտեցում կցուցաբերվի Արցախի դիմորդներին:
Հարցը դեռ չի քննարկվել նախարարությունում, բայց անպայման առաջիկա օրերին կքննարկվի, կտեղեկացնենք հանրությանը: Նաեւ բուհերին կգնա շրջաբերական, որ Արցախի դիմորդներին անհատական մոտեցում ցուցաբերվի, մասնավորապես՝ իրենց իրենք ամենայն հավանականությամբ կսքանավորեն եւ էլեկտրոնային տարբերակով կուղարկեն իրենց փաստաթղթերը: Ամեն դեպքում հարցը կլուծվի հօգուտ դիմորդների»:
Կարդացեք նաև
Գոհար ՀԱԿՈԲՅԱՆ
