«Gallup International Association»-ի Հայաստանում լիիրավ անդամ Էմ Փի Ջի ՍՊԸ տնօրեն Արամ Նավասարդյանն այսօր ասուլիսում ներկայացրեց առաջիկա ավագանու ընտրությունների վերաբերյալ հարցման արդյունքները, որն իրականացվել է սեպտեմբերի 5-ից 6-ն ընկած ժամանակահատվածում:
«Այս թեմայով մեր հետազոտությունների երկու փուլ արդեն ներկայացրել ենք: Սա, ամենայն հավանականությամբ, կլինի նախավերջինը: Վերջինը կլինի սեպտեմբերի 14-ին կամ 15-ին: Այսօր հրապարակվելիք արդյունքները քարոզարշավի ճանապարհի կեսի արդյունքներն են: Բայց մենք բոլորս գիտենք, որ երկրորդ հատվածն ավելի ակտիվ է լինում»,- ասաց Արամ Նավասարդյանը:
Նրա դիտարկմամբ, այս անգամվա քարոզարշավն ավելի քիչ է տեսանելի, հավանաբար, այն պատճառով, որ գուցե ավելի շատ գնացել են էլեկտրոնային մեդիայի ուղղությամբ: «Նախկին բակային հանդիպումների ֆորմատը, երբ հավաքվում էր ժողովուրդը, այս անգամ շատ թույլ է այս նախընտրական շրջանում»,-նկատեց բանախոսը:
Հարցին, թե քաղաքապետի պաշտոնը ավելի շատ քաղաքակա՞ն է, թե՞ մենեջերի, ապրիլ ամսվա նույն հարցման պատասխանների տոկոսի մեջ այս անգամ նկատելի փոփոխություն է արձանագրվել: Մայրաքաղաքի բնակիչներն այս պաշտոնը ավելի շատ սկսել են ընկալել որպես քաղաքական: Գարնանը 58,3 տոկոսն ասել էր, որ քաղաքապետի պաշտոնը կառավարչի պաշտոն է, իսկ քաղաքական նշել է 37,2 տոկոսը: Իսկ հիմա քաղաքապետի պաշտոնը քաղաքական համարում է 41,3 տոկոսը:
Կարդացեք նաև
7,4 տոկոսով աճել է նաեւ այն քաղաքացիների տոկոսը, որոնք ծանոթացել են ընտրությանը մասնակցող քաղաքական ուժերի նախընտրական ծրագրերին:
Հարցման արդյունքով պարզվել է, որ երեւանցիներն ավելի շատ հետաքրքրում են չորս քաղաքական ուժի՝ «Քաղաքացիական պայմանագիր», «Ազգային առաջընթաց», «Ապրելու երկիր» կուսակցությունների եւ «Մայր Հայաստան» դաշինքի նախընտրական ծրագրերը:
Սակայն 94 տոկոսը նաեւ նշել է, որ չի մասնակցել բակային հանդիպումներին: Իսկ մասնակցածները ամենից շատ նախընտրել են ՔՊ եւ «Ապրելու երկիր» կուսակցությունների եւ «Մայր Հայաստան» կուսակցությունների դաշինքի կազմակերպած միջոցառումները:
Հարցին, թե մասնակցելո՞ւ է ավագանու ընտրություններին, 55,3 տոկոսը պատասխանել է, որ միանշանակ մասնակցելու է, 14,5 տոկոսը՝ ավելի շուտ՝ այո, ավելի շուտ ոչ՝ 7,8 տոկոսը եւ միանշանակ ոչ՝ 19,3 տոկոսը:
Եվ վերջապես՝ ամենահետաքրքիր հարցի պատկերը, թե որ ուժին է պատրաստվում քվե տալ երեւանցին, կրկին ցույց է տալիս, որ ավագանու ընտրություններում հաջողություն արձանագրելու գլխավոր հավակնորդներն են ՔՊ-ն, «Ազգային առաջընթացը», «Մայր Հայաստանը» եւ «Ապրելու երկիրը»:
Աշոտ ՀԱԿՈԲՅԱՆ
