«Դեռեւս հայտնի չէ ինչ նամակ է գրել Փաշինյանը Պուտինին։ Ես չեմ հիշում նաեւ դեպք, երբ Ռուսաստանում մեր դեսպանը կանչվեր ԱԳՆ»,- այսօր «Հենարան» մամուլի ակումբում կայացած մամուլի ասուլիսում հայտարարեց ՀՀԿ ԳՄ անդամ, ԱԺ նախկին փոխնախագահ Էդուարդ Շարմազանովը՝ հայ-ռուսական հարաբերություններում այս ճգնաժամի մեղավորը համարելով Հայաստանի ՔՊ-ական իշխանությանը։ «Բոլորս ունենք Ռուսաստանին հարցեր տալու, նրանից ինչ-որ բաներ պահանջելու իրավունք, բայց ոչ երբեք Նիկոլ Փաշինյանը, որովհետեւ ինքն է հրաժարվել Արցախից»,- ասաց Էդուարդ Շարմազանովը՝ նոյեմբերի 9-ի հայտարարությունը պայմանավորված կերպով խախտելու եւ Բերձորի միջանցքը փակելու մեջ մեղադրելով Նիկոլ Փաշինյանին եւ Իլհամ Ալիեւին։
«Պուտինն այսօր շատ կարեւոր բան է ասել, եթե բաց ասեմ, ասել է՝ Սերժ Սարգսյանն ու ՀՀԿ-ն ճիշտ էին, դու՝ սխալ, Նիկոլ»,- հայտարարեց ընդդիմադիր գործիչը՝ անդրադառնալով ՌԴ նախագահ Վլադիմիր Պուտինի այսօր արած այն հայտարարությանը, որ Ռուսաստանը որեւէ կերպ միջամտել չի կարող Արցախի հարցում, քանի որ Նիկոլ Փաշինյանն Արցախը ճանաչել է Ադրբեջանի մաս։
Նկատելով, որ թուրքական կողմը որեւէ զիջումով չի բավարարվելու, Էդուարդ Շարմազանովը վստահեցնում է, որ հայ ժողովրդի 5000-ամյա պատմության ամենահերոսական էջը՝ Արցախյան հաղթանակը, չի մսխվելու եւ թուրքը հային չի հաղթելու։ Ստեղծված իրավիճակի համար էլ նա մեղադրում է ոչ թե ժողովրդին, այլ քաղաքական էլիտային, բայց որ Հայաստանի ղեկավարին փոխելու պարագայում հաղթանակը կերտվելու է՝ նա կասկած չունի։ Եթե ձախողված Նիկոլ Փաշինյանը դեռ շարունակում է պաշտոնավարել, դա Էդուարդ Շարմազանովը համարում է ընդդիմության անհաջողությունը, միաժամանակ մտածելով, որ նույն ընդդիմության պայքարի շնորհիվ է, որ Փաշինյանի վարկանիշը իջել է 13 տոկոսի։ Իսկ Նիկոլ Փաշինյանին հեռացնելու բանաձեւը նրա համար հստակ է՝ յուրաքանչյուր դերակատար պետք է մտածի ոչ թե իշխանության գալու, այլ իշխանափոխության մասին։ Իսկ Հայաստանում իշխանափոխության հնարավորության նա միանշանակ տեսնում է՝ հավելելով, որ Արցախի հերոսական ժողովուրդն է այդ հնարավորությունը մեզ տալիս։
Կարդացեք նաև
Նելլի ԳՐԻԳՈՐՅԱՆ
