Ինչպես հայտնի է՝ Հայաստանի վարչապետի աշխատակազմն ու Ադրբեջանի նախագահի վարչակազմը հանդես են եկել համատեղ հայտարարությամբ․ Ադրբեջանը վերադարձնում է գերեվարված 32 զինծառայողների։
32 զինծառայողների անուններն արդեն իսկ շրջանառվում են ադրբեջանական կայքերում․ նրանցից 26-ը Շիրակի մարզից են․ 2020 թվականի դեկտեմբերին Հադրութի շրջանի Խծաբերդի հատվածում գերի ընկածներն են։
Ըստ ադրբեջանական կողմի, «Հայաստան տեղափոխվող 32 անձանցից 26-ը ձերբակալվել են 2020 թվականի դեկտեմբերին Հադրութի շրջանում, իսկ մնացած 6-ը տարբեր ժամանակներում բերման են ենթարկվել սահմանին։ Այս բոլոր մարդիկ արդեն կրել են իրենց պատժի մեծ մասը»։
32 հոգանոց ցուցակում չկան ՀՀ Արցախի նախկին նախագահներ Արայիկ Հարությունյանը, Բակո Սահակյանը, Արկադի Ղուկասյանը, չկան նաև Ռուբեն Վարդանյանը, Վագիֆ Խաչատրյանը, Ալյոշա Խոսրովյանը։
Կարդացեք նաև
Տեղեկություն է շրջանառվում նաև այն մասին, որ Հայաստանը վերադարձնելու է Երևանում դատապարտված ադրբեջանցի զինվորականներ Բաբիրով Աքշին Գաբիլի և Ախունդով Հուսեյն Ահլիման օղլուներին։
Հիշեցնենք՝ նրանք ներխուժել էին Հայաստան, նրանից մեկը՝ Ագշին Բաբիրովը մոտ 11 տարվա ազատազրկման էր դատապարտվել․ նա մեղավոր է ճանաչվել սահմանն ապօրինի հատելու, պետական սահմանով հրազեն և ռազմամթերք ապօրինի տեղափոխելու համար։
Վերջինս ընդունել էր իրեն առաջադրված մեղադրանքը։ Երկրորդ զինվորը՝ Հուսեյն Ախունդովը մեղադրվում է նաև «Զանգեզուրի պղնձամոլիբդենային կոմբինատին» պահակին սպանելու համար։
Նշվում է նաև այն մասին, որ այս երկուսից բացի Հայաստանում գերի ընկած այլ ադրբեջանցիներ չկան։
Նունե ԱՐԵՎՇԱՏՅԱՆ
