Երևանի ընդհանուր իրավասության քրեական դատարանում դատավոր Կարեն Ֆարխոյանի նախագահությամբ այսօր շարունակվեց Նիկոլ Փաշինյանի ավտոշարասյան կողմից հղի կնոջը՝ Սոնա Մնացականյանին վրաերթի ենթարկելու գործով դատական նիստը։
Տուժողի իրավահաջորդի ներկայացուցիչ Րաֆֆի Ասլանյանն Aravot.am-ի հետ զրույցում տեղեկացրեց, որ պաշտպանական կողմը միջնորդություն է ներկայացրել՝ դատաավտոտեխնիկական կրկնակի փորձաքննություն իրականացնելու համար:
«Իրենք, ըստ իս՝ յուրովի մեկնաբանություններ են անում, գտնում են, որ նախաքննության ընթացքում նշանակված երեք փորձաքննությունները դեռեւս բավարար չեն»,- ասաց Րաֆֆի Ասլանյանը:
Հայցվոր կողմի առարկությունները ներկայացնելու համար դատարանը ժամանակ է հատկացրել՝ մինչեւ փետրվարի 21-ը:
Կարդացեք նաև
Այս գործն արդեն մեկ տարի է, ինչ դատարանում է, այժմ հիմնական դատալսումներն են ընթանում. բոլոր վկաները հարցաքննված են, վարույթի բոլոր ապացույցները հետազոտված են, պաշտպանության կողմի միջնորդությամբ փորձագետը հարցաքննված է:
Նելլի ԳՐԻԳՈՐՅԱՆ
